Ытыктабыллаах бэтэрээннэр, кэллиэгэлэр, күндү үөрэнээччилэр!

Улуу Кыайыы 81 сылынан барыгытын итиитик-истиҥник эҕэрдэлиибин! Бу күн хас биирдиибитигэр харах уулаах, киэн туттуулаах ытык күн буолар. Кэлэр көлүөнэлэр эйэлээх халлаан анныгар олороллорун туһугар эдэркээн олохторун толук уурбуттар, сэрии толоонугар эмсэҕэлээн төннүбүттэр, тыылга күнүстэри-түүннэри кыайыыны уһансыбыттар сырдык ааттарыгар сүгүрүйэбит, төбөбүтүн хоҥкутабыт.

Аҕа дойду Улуу сэриитигэр кыайыы – сэбиэскэй норуот булгуруйбат эр санаатын, элбэх бырааттыы омуктар тулхадыйбат доҕордоһууларын, кыра оҕотуттан аарыма кырдьаҕаһыгар тиийэ дойдуга тапталларын, бэриниилээх буолууларын чаҕылхай холобура буолар.

Бүгүн махтанан туран Мэҥэ-Хаҥалас оройуонуттан фроҥҥа ыҥырыллан барбыт 112 учууталы ахтан-санаан ааһабыт. Кинилэртэн 46 киһи сэрииттэн эргиллибэтэҕэ. Сэрии хара маҥнайгы күнүттэн оскуолалар выпускниктара тылланан дойдуларын көмүскүү барбыттара. Сэриини чиэстээхтик кыайбыт көлүөнэ дойдуну чөлүгэр түһэрбитэ, эйэлээх, нус-хас  олоҕу оҕолоругар, сиэннэригэр бэлэхтээбитэ.

Биһиги, бүгүҥҥү көлүөнэ дьон, фронтовиктар, тыыл дьоруойдарын ааттарын чиэстээхтик сүгүөхтээхпит, эйэлээх олоҕу харыстыахтаахпыт, сэрии туһунан өйдөбүлү оҕолорго, ыччаттарга тиэрдиэхтээхпит, сэрии ыар күннэрэ хатыламматын туһугар олоруохтаахпыт, үлэлиэхтээхпит. Төрөөбүт дойдубут чэлгийэ сайдарын туһугар күүспүтүн түмүөҕүн, улууспутун, өрөспүүбүлүкэбитин сайыннарыаҕын.

Суох буоллун сэрии! Туругурдун эйэ!

Ирина Плотникова,

Мэҥэ Хаҥалас улууһун үөрэҕириигэ салалтатын начальнига