Ытыктабыллаах кэллиэгэлэр, үөрэҕирии ситимин бары үлэһиттэрэ, педагогическай үлэ бэтэрээннэрэ!

Ис сүрэхпиттэн эһигини Саас уонна Үлэ бырааһынньыгынан – Ыам ыйын 1 күнүнэн эҕэрдэлиибин!

Бу күн – сомоҕолоһуу, биир санааланыы, кэлэр кэскил туһугар айар-тутар үлэ бэлиэтэ буолар. Бу күн биһиги үлэни өрө туппут, улууспут, өрөспүүбүлүкэбит уонна дойдубут сайдарыгар күннэтэ кыһаллар дьоммутун дириҥ махталынан ахтабыт.

Эһиги бэриниилээх үлэҕит, эппиэтинэскит иннибитигэр турар баараҕай сыалларбыт олоххо киирэллэригэр олук буолаллар, улууспут үөрэҕириитин тиһигэ ситиһиилээхтик сайдарыгар кыаҕы биэрэллэр. Онон хас биирдиигит киллэрбит кылааккытынан киэн туттуохтааххыт.

Саас уонна Үлэ бырааһынньыга – биир сомоҕо буоллахха ханнык баҕарар сорук кыалларын өссө төгүл санатар. Саха Өрөспүүбүлүкэтин бастакы Бэрэсидьиэнэ М.Е.Николаев  “Үлэ көҕө диэн бу улуу күүс” диэн эппитин  өрүү өйдүөхтээхпит, олохпутун сирдэтиниэхтээхпит.

Барыгытыгар чөл туругу, үлэҕэ үрдүк ситиһиини, дьиэ-кэргэҥҥитигэр этэҥҥэ буолууну, байылыат олоҕу баҕарабыт.  Хас биирдии үүнэр күҥҥүт чаҕылхай буоллун, үлэттэн, олохтон дуоһуйууну бэлэхтээтин! Сир ийэбитигэр эйэлээх олох туругурдун, күөх халлааҥҥа сырдык күн сандаарыйа тыктын!

Бырааһынньыгынан!

Мэҥэ Хаҥалас улууһун үөрэҕириигэ салалтатын начальнига

Ирина Плотникова