Кулун тутар 5 күнүгэр Мэҥэ Хаҥалас улууһугар Саха Национальнай байыаннай оскуолатын Знамятын туттарыы тэрээһинэ үөрэх салалтатын аактабай саалыгар буолан ааста. Бэлиэ тэрээһин Саха Республикатыгар байыаннай үөрэхтээһин 100 сылыгар ананан ыытылынна.

Саха Национальнай байыаннай оскуолата 1926 сыллаахха Платон Алексеевич Ойуунускай көҕүлээһинэн тэриллибитэ. Саха сиригэр байыаннай үөрэхтээһин саҕаланыытыгар уонна оскуола сайдыытыгар биир дойдулаахпыт Кузьма Осипович Гаврилов сүрүн оруолу ылбыта. Кини бастакы национальнай офицердар бэлиитикэҕэ уонна экэниэмикэҕэ чиҥ билиилээх буолалларыгар дириҥ ис хоһоонноох үлэни ыытыспыта. 1930 сыллаахха Саха Национальнай байыаннай оскуолаҕа гражданскай сэрии дьоруойа, ЧОН этэрээт хамандыыра Иннокентий Егорович Алексеев аата иҥэриллибитэ. Оскуола 1926 - 1941 сс. 900-тэн тахса Кыһыл Аармыйа хамандыырдарын бэлэмнээбитэ. Буойуннар Халгин-Гол кыргыһыытыгар, Аҕа Дойду Улуу сэриитин уоттаах хонууларыгар, дьоппуон Квантунскай аармыйатын үлтүрүтүүгэ дьоруойдуу кыргыспыттара, хас биирдиилэрэ Аҕа дойдуларын көмүскэлигэр уонна Улуу Кыайыыга сүҥкэн кылааттарын киллэрбиттэрэ.

Саха Национальнай байыаннай оскуолатын Знамятын Дьокуускайдааҕы кадетскай оскуола кадеттара Сэбиэскэй Сойуус Дьоруойа Ф.К. Попов аатынан Баатара орто оскуолатын кадеттарыгар үөрүүлээх быһыыга туттардылар. Патриотическай тэрээһиҥҥэ Майа В.П. Ларионов, Майа Ф.Г. Охлопков, Хаптаҕай орто, Бүтэйдээх орто оскуоларыттан эдэр юнармеецтар уонна педагогтар кыттыыны ыллылар. Үөрүүлээх чааска Стручков Ф.А., улуустааҕы үөрэх салалтатын начаалынньыгын солбуйааччыта уонна Попов Р.А., Саха Өрөспүүбүлүкэтин үүнэр көлүөнэни байыаннай-патриотическай итиигэ  киинин салайааччыта, Дьокуускайдааҕы кадетскай оскуола-интернат дириэктэрин солбуйааччыта эдэр юнармеецтарга Знамя туттарсыытын суолталаах ис хоһоонун арыйан тыллары анаатылар. Слободчикова М.Н., Хаптаҕай орто оскуолатын педагога, нэһилиэк кыраайы үөрэтэр түмэлин салайааччыта биир дойдулааҕын, гражданскай сэрии дьоруойа Иннокентий Егорович Алексеев бойобуой сырыытын, кылгас чаҕылхай олоҕун сырдатта. Стручков Николай, Бүтэйдээх орто оскуолатын 10 кылааһын үөрэнээччитэ, “Хоһуун” байыаннай-патриотическай кулууп иитиллээччитэ Кузьма Осипович Гаврилов, биллиилээх судаарыстыбаннай-бэлитиичэскэй диэйэтэл олорон ааспыт дьоһун олоҕун уонна үлэтин чинчийэн үөрэтэллэрин, кини аатынан киэн тутталларын кэс тылынан эттэ.

Түмүккэ Жиркова А.П., Баатара орто оскуолатын дириэктэрэ кадеттар салгыы байыаннай үөрэх кыһаларыгар үөрэнэн Россия аармыйатыгар, ис дьыала уорганнарыгар уонна суһал быһыы тэрилтэлэргэ сулууспаллыыларын, байыаннай дьайыыга 26 кадетскай кылаас выпускниктара кыттааччы буоллалларын, кинилэр истэриттэн  9 буойун Аҕа Дойдуларын туһугар тыынарын толук уурбуттарын этэн туран, Саха Национальнай байыаннай оскуолатын курсаннарын хорсун быһыылара аныгы бириэмэҕэ кадетскай үөрэҕинэн утумнанан салҕанарын эттэ уонна кэнчээри ыччакка сайдыыны, кэскили баҕарда.

Улууспут оскуолаларыгар Саха Өрөспүүбүлүкэтигэр байыаннай үөрэхтээһин 100 сылын бэлиэтээһин чэрчитинэн, Саха Национальнай байыаннай оскуола килбиэннээх устуоруйатын үйэтитэн анал уруоктар уонна патриотическай тэрээһиннэр ыытыллыахтара.

Знамяны Өрөспүүбүлүкэ устун ыытыллар Эстафета чэрчитинэн  Амма улууһугар туттарыы буолуоҕа.