Күндү аҕа сүбэһиттэр, ытыктабыллаах кэллиэгэлэр!

Идэлээх халандаарбытыгар саҥа киирбит дириҥ суолталаах Аҕа сүбэһит күнүнэн улуустааҕы үөрэҕирии салалтатын уонна тус бэйэм ааппыттан ис сүрэхпиттэн эҕэрдэлиибин!

Бүгүн биһиги оҕо-ыччат үүнэригэр-сайдарыгар, бэйэтигэр эрэллээх буоларыгар баай уопуттарын, дириҥ билиилэрин, амарах сыһыаннарын аныыр дьоммутугар барҕа махтал тылларбытын аныыбыт. Эһиги үлэҕит улууспут, өрөспүүбүлүкэбит уонна дойдубут инники кэскилигэр ананарын өйдүүбүт.

Настаабынньыктааһын күн бүгүн үөрэҕирии тиһигин барытын, уопсастыбаннай тэрилтэлэри уонна волонтердар көҕүлээһиннэрин хабар. Аҕа сүбэһиттэр оҕолорго, ыччакка инники суолларын таба тайаналларыгар, дьоҕурдарын арыйалларыгар көмөлөһөллөр, үлэ,эппиэтинэс, патриотизм сыаннастарын иитэллэр. Чуолаан, үөрэх тэрилтэлэригэр кинилэр эдэр педагогтары өйүүллэр, идэлэригэр такайаллар. Кылаас салайааччылара, тьютордар, куруһуоктар, секциялар салайааччылара иитиллээчилэрин дьылҕатыгар аҕа сүбэһит быһыытынан ураты суоллаахтар, тус бэйэлэрин холобурдарынан кинилэргэ суолдьут сулус буолаллар.

Күндү аҕа сүбэһиттэрбитигэр чэгиэн туругу, саҥаттан саҥа ситиһиилэри, махталлаах үөрэнээччилэри, аттыгытыгар сылдьар биир санаалаахтары баҕарабын. Эһиги үтүө санааҕыт тус бэйэҕитигэр дьон ытыктабыла, билиниитэ, сылаас сыһыана буолан эргилиннин.

Ирина Плотникова, Мэҥэ Хаҥалас улууһун үөрэҕириигэ салалтатын начаалынньыга