Олунньу 17 күнүгэр Майаҕа Д.Ходулов аатынан норуот айымньытын дьиэтигэр Мэҥэ-Хаҥалас улууһун оҕону эбии үөрэхтээһин киинэ тэрийиитинэн хаһыс да сылын ыытыллар үгэскэ кубулуйбут «Ыллаа-туой оҕо саас» улуустааҕы ырыа күрэҕэ буолан ааста. Күрэххэ 19 оскуолаттан 310 оҕо кыттыыны ылла. Балаһыанньа быһыытынан кыттааччылар патриотическай уонна көҥүл тиэмэҕэ уопсайа иккилии ырыаны толордулар. Ансаамбыл быһыытынан уонна биирдиилээн толоруу маастарыстыбата сыаналанна. Дьүүллүүр сүбэ бэрэссэдээтэлэ оҕону эбии үөрэхтээһин киин диэриэктэрэ Светлана Аргунова быйылгы күрэххэ урукку сыллардааҕар кыттааччылар бэлэмнээхтэрин, сценическэй культура таһыма үрдээбитин, сыанаҕа туттуу-хаптыы, таҥас-сап тупсубутун, салайааччылар репертуары сөпкө аттарбыттарын бэлиэтээтэ. Түмүк бөлөхтөрүнэн араарыллан таҕыста, ансаамбылларга уонна биирдиилээн толоорооччуларга дипломаннар, лауреаттар билиннилэр. Улуустааҕы «Ыллаа-туой оҕо саас» ырыа күрэҕэр Гран-при үрдүк ааты Сахаяна Ларионова салайааччылаах Ф.Г.Охлопков аатынан Майа орто оскуолатын вокальнай ансаамбыла сүктэ.

Зоя Герасимова.