Кулун тутар 14 күнүгэр С.З. Борисов аатынан Тыыллыма орто оскуолатыгар Бүтүн Россиятааҕы үүнэр көлүөнэ фестивалын улуустааҕы түһүмэҕэ Улуу Кыайыы 80 сылыгар ананан ыытылынна. Фестиваль Российскай Федерация үөрэҕириитин министерстватын уонна ДОСААФ-Россиятааҕы общественно-государственнай тэрилтэ көҕүлээһиннэринэн оскуола үөрэнээччилэрэ этэ-хаан өттүнэн сайдыылаах, инникитин байыаннай сулууспаҕа сыстаҕас уонна Аҕа дойдуга бэриниилээх буола улааталларыгар туһаайыллан ыытыллар.

Улуустааҕы түһүмэххэ барыта 13 оскуолаттан 19 хамаанда: Майа В.П.Ларионов аатынан, Майа Ф.Г.Охлопков аатынан, Аллараа-Бэстээх М.Е.Попов аатынан, Аллараа-Бэстээх №2, Хара орто, Павловскай орто, Наахара орто, Табаҕа орто, Баатара орто, Хаптаҕай орто, Чыамайыкы орто, Бырама ситэтэ суох орто уонна олохтоох Тыыллыма орто оскуолалара кыттыыны ыллылар.

Балаһыанньа быһыытынан хамаандаҕа 14-15 саастаах кыыс уонна уол киирэннэр: “Визитка” куонкурсугар, туран эрэ бэргэнник ытыыга, сиртэн анньыныыга, гранатаны ыраах быраҕыыга күрэстэстилэр. Хамаанданан "Визиткэ" куонкурсугар оҕолор бэйэлэрин, үөрэнэр оскуолаларын билсиһиннэрдилэр, Улуу Кыайыы 80 сылынан тематическай дьүһүйүүлэри көрдөрдүлэр. Куонкуруска бастыҥнарынан М.Е.Попов аатынан Аллараа Бэстээх оскуола хамаандата (Пасисниченко Света, Кириллин Данил) ааттаннылар. Ытыыга уолаттарга Назаров Ян (41 очко), Тыыллыма орто оскуолатын, кыргыттарга Аржакова Катя (55 очко), Ф.Г. Охлопков аатынан Майа орто оскуолатын үөрэнээччилэрэ бастакы миэстэни ыллылар. Бириэмэҕэ түргэнник сиртэн анньыныыга уолаттарга Слепцов Ваня - 53 төгүл, Никифорова Маша - 35 төгүл оҥороннор Баатара орто оскуолатын кадеттара кыайдылар. Гранатаны ыраах быраҕыыга уолаттарга Черноградскай Ньургун, Павловскай оскуолатын 1-кы хамаандатыттан – 47,9 миэтэрэни, кыргыттарга Прокопьева Лариса, Тыыллыма оскуолатын 2-ис хамаандатыттан – 18,5 миэтэрэни быраҕаннар бастыҥнарынан таҕыстылылар.

Уопсай түмүккэ кыайыылаахтарынан буоллулар:

1 миэстэ – Павловскай орто оскуолатын 1-кы хамаандата (Черноградскай Ньургун, Сивцева Николина, салайааччы Балаганчиков Н.Я.);

2 миэстэ – Павловскай орто оскуолатын 3-үс хамаандата (Федоров Одун, Антонова Кира, салайааччы Балаганчиков Н.Я.);

3 миэстэ – Баатара орто оскуолатын командата (Слепцов Ваня, Никифорова Маша, салайааччы Сосин А.Е.).