Олунньу 2 күнүттэн 12 чыыһылатыгар диэри Мэҥэ-Хаҥалас улууһугар В.П.Ларионов аатынан Майа орто оскуолатыгар Сахаттан бастакы академик Владимир Петрович Ларионов 80 сааһыгар анаммыт декада түмүктэннэ. Түмүктүүр тэрээһин оскуола иннигэр Владимир Петрович пааматынньыгар сибэкки дьөрбөтүн ууруу сиэриттэн саҕаланна. Ол кэннэ торжественнай линейкаҕа ыҥырыылаах ыалдьыттар, учууталлар уонна үөрэнээччилэр муһуннулар. В.П.Ларионов кэргэнэ РФ үтүөлээх бырааһа Люция Спиридоновна Ларионова, кыыстара Майя Владимировна, СР «Ил Түмэн» государственнай мунньах бэрэссэдээтэлэ Александр Жирков, СР «Ил Түмэн» государственнай мунньаҕын депутата Юрий Баишев, Мэҥэ-Хаҥалас улууһун депутаттарын мунньаҕын сэбиэтин бэрэссэдээтэлэ Андрей Находкин, Россия наукатын академиятын Сибиирдээҕи салаатын Дьокуускайдааҕы научнай киин дириэктэрэ Михаил Лебедев, Мэҥэ-Хаҥалас улууһун үөрэҕин управлениетын начальнига Ирина Черкашина, СР народнай артыыһа, Комсомол бириэмийэтин лауреата Аркадий Алексеев, ХИФУ профессора, В.П.Ларионовы кытары бииргэ үөрэммит үөлээннээҕэ Тимофей Назаров, «Сырдык» фонда дириэктэрэ Александр Иванов о.д.а кыттыыны ыллылар. Саха норуота бүттүүн киэн туттар, Саха бастакы академига, тумус туттар биир дойдулаахпыт, албан ааттаах В.П.Ларионов аатын сүгэр оскуола самнан биэрбэт саргылаах, кэлэр кэнчээри ыччат кини үрдүк аатыгар сүгүрүйэр. Бу күн В.П.Ларионов 80 сааһыгар анаммыт «Үтүө үтүөнү үксэтэр» диэн саҥа сурунаал-кинигэ сүрэхтэниитэ үрдүк таһымҥа ааста.

Зоя Герасимова.