Ыам ыйын 19-23 күннэригэр И.М. Романов аатынан Төхтүр орто оскуолатын базатыгар (дириэктэр Романов Н.В.) улуус оскуолаларын 10 кылаас уолаттарыгар 5 күннээх учебно-полевой сбор буолан ааста. Быйылгы сбор Улуу Кыайыы үбүлүөйдээх 80 сылыгар ананан үрдүк таһымҥа ыытылынна.

Сборга улуус 25 орто оскуолаларыттан барыта 153 онус кылаас уолаттара уонна “Основы безопасности и защиты Родины” предмет учууталлара кыттыыны ыллылар. Аллараа Бэстээх М.Е. Попов аатынан орто оскуола учуутала, анал байыаннай эппэрээссийэ кыттыылааҕа, Харлампьев Г.А., сбор начальнигынан; Васильев П.В., Наахара орто оскуолатын учуутала, штаб начальнигынан; Баишев Е.З., Майа Ф.Г.Охлопков аатынан оскуола учуутала, начальнигы үөрэх чааһыгар солбуйааччынан; Эверстов В.С., Төҥүлү орто оскуолатын учуутала, начальнигы физподготовкаҕа солбуйааччынан учебно-полевой сбор штабын ананан, иилээн-саҕалаан ыыттылар. “Килбиэн” улуустааҕы бойобуой дьайыылар бэтэрээннэрин уопсастыбатын чилиэннэрэ, анал байыаннай дьайыы бэтэрэээннэрэ (салайааччы Сергеев А.Н.) патриотическай тэрээһин ситиһиилээхтик барарыгар күүс-көмө буоллулар.

Биэс күннээх сборга юнармеецтэр “Основы безопасности и защиты Родины” үөрэх предметин "Основы воинской службы" раздел практическай чааһын үөрэтиини аастылар. Программаҕа Россия сэбилэниилээх күүстэрин устаабын, стройунан хаамыы, бойобуой тактика, химическэй-бактериологическай сэрии сэбиттэн көмүскэнии, байыаннай топография, бааһырбыкка бастакы медицинскэй көмөнү оҥоруу чаастарын үөрэтии киирэллэр. Уолаттар эт-хаан өттүнэн кыанар буолууларын эрчийии сарсыардааҥы зарядкаларынан, күнүскү эрчиллиилэринэн, нормативтары туттарыыларынан уонна военно-спортивнай күрэхтэһиилэринэн ыытылынна. Эбии занятиенан Улуустааҕы оҕо-ыччат техническэй киинин үлэһиттэрэ ыам ыйын 19-20 күннэригэр пилота суох көтөр аппараттары (БПЛА) үөрэтии занятияларын уонна хамаанданан күрэхтэһиилэри оҥордулар. Ыам ыйын 23 күнүгэр "Оҕо аймах сирдьиттэрэ" хамсааһын тэрийиитинэн юнармейскай күрэхтэһиилэр, хамаанданан “Зарница 2.0” оонньуу ыытылынна. Байыаннай сбор түмүктүүр күнүн тэрээһиннэринэн: военизированнай эстафета, сарсыарда күн тахсыытын көрсө бойобуой тревога, марш-броск буоллулар. Киэһээҥҥи сынньалаҥ бириэмэтигэр оҕолорга викториналар, ветераннары кытта көрсүһүүлэр, араас сайыннарар оонньуулар ыытылыннылар. Ыам ыйын 22 күнүн киэһэтигэр сбор кыттыылаахтара нэһилиэк олохтоохторугар уус-уран концерт көрдөрөн, көрөөчүлэр биһирэбиллэрин ыллылар. Концерт сбор бары кыттыылаахтарын оһуохайынан түмүктэннэ. Түмүккэ үөрэнээччилэр сбору ааспыттарын туоһулуур зачетнай книжкалары туттулар, бастыҥ юнармеецтэр грамоталарынан, дипломнарынан наҕараадалыннылар.

Учебно-полевой сбор кэрэхсэбиллээх түгэнинэн биир саастыылаах оҕолор бииргэ түмсэн билсиһиилэрэ, биир хамаанда буолан алтыһыылара уонна доҕордоһуулара буолар. Улууспут оскуолаларын 10 кылааһын уолаттара улуустааҕы сборга тургутуулары ситиһиилээхтик ааһаннар, байыаннай дьыалаҕа элбэҕи билэн-көрөн, үгүс табаарыстанан, инникигэ эрэллээх эр санаалаах тарҕастылар.