Уол оҕо - норуот кэскилэ, самныбат саргыта.

Олунньу 27 күнүгэр М.П. Габышев аатынан Балыктаах орто оскуолатыгар улуустааҕы “Тыл хоһууна” күөн күрэх тэрилиннэ.

"Тыл хоһууна" Дорҕоон Дохсун бырайыагын Балыктаах орто оскуолатын учууталлара Бурнашева А.Ф. Говорова А.Н. Цыпандина К.Н. Молукова С.С. "Төлкө" уопсастыбаннай түмсүүнү кытта (салайааччы Холмогорова А.А.) бу 15 сыл устата үлэлэтэн кэллилэр.

Бу сылга оскуола базатыгар үһүс төгүлүн ыытыллыбыт тэрээһиҥҥэ барыта 5 оскуолаттан сэттэлии уоллаах хамаандалар кэлэн күөн көрүстүлэр. Күрэх түһүмэхтэрин бырайыак ааптара Дорҕоон Дохсун иилээн-саҕалаан ыытта. Уолаттар 4 түһүмэхтээх күрэххэ: Бэйэни билиһиннэриигэ; хамаанданан күөн көрсүүгэ, тумус дьон түһүмэҕэр; өбүгэ оонньуутугар илин былдьастылар.

Дьүүллүүр сүбэҕэ "Төлкө" уопсастыбаннай түмсүү салайааччыта Холмогорова А.А; поэт, драматург, киинэ режиссера Гаврильева А.К. - Илситимэ; история уонна обществознание учуутала Николаев Н.Н; "Тыл хоһууна" күрэхтэргэ анал ааттаах оскуолабыт выпускнига Николай Неустроев үлэлээтилэр.

Түмүккэ Матта оскуолатын уоланнара "Дьоһун көстүү"; Аллараа Бэстээх 2 нүөмэрдээх оскуолата "Кыайыыга дьулуурдаах" анал аатынан бэлиэтэннилэр. Үһүс миэстэҕэ Төҥүлү орто оскуолата, иккис миэстэҕэ Аллараа Бэстээх 1 нүөмэрдээх оскуолата таҕыстылар.

Бары түһүмэххэ ситиһиилээхтик кыттан Балыктаах оскуолатын хамаандата кыайыылаах буолла.

Итини сэргэ дьүүллүүр сүбэ бастыҥнарга анал ааттары туттарда: "Сымса бө5ө" - Сайаан Ушницкай Балыктаах; "Кэскиллээх этээччи" - Ефим Ефремов Төҥүлү; "Кыайыыга дьулуурдаах" - Ярослав Громов - Аллараа Бэстээх 1 нүөмэрдээх оскуолата; "Бэргэн тыллаах" - Миша Ноговицын - Балыктаах уонна кылаан аатынан - "Тыл хоһуунун" - Эрсан Протодьяконов Матта оскуолата бэлиэтэннилэр.

Дорҕоон Дохсун Сайаан Ушницкайга, Ярослав Громовка анал бирииһин туттарда.

Күрэххэ кылаан бирииһи маҥнайгы "Тыл хоһууна" - анал ааттаах, билигин ситиһиилээхтик фермеринэн үлэлии сылдьар Дьулустаан Говоров, хамаандаларга бириистэри ааспыт сылларга кыттан кэлбит уолаттарбыт, кинилэр төрөппүттэрэ, гуманитарнай МО учууталлара туруордулар.

Тэрээһини көҕүлээбит, кыттыспыт, үлэлэспит бары дьоммутугар барҕа махтал!