Олунньу 20-21 күннэригэр И.Г. Игнатьев аатынан Хара спортивнай орто оскуолатыгар үгэс буолбут улуустааҕы “Сыл бастыҥ учуутала”, “Сыл бастыҥ эдэр педагога” күрэхтэр буолан аастылар. Күрэхтэргэ 19 учуутал кыттыыны ылла.

Күрэхтэр 3 түһүмэҕинэн бардылар: уруок, маастар-кылаас, брифинг. Уруокка күрэх кыттааччылара үөрэх саҥа технологияларын төһө сатабыллаахтык туһаналларын, үөрэнээччилэри кытта сатаан алтыһалларын көрдөрдүлэр. Маастар-кылаастарга бэйэ уопутун ырытан, уруокка көдьүүстээхтик туттар ньымаларын кэллиэгэлэрин кытта үллэһиннилэр. Дойдуга, өрөспүүбүлүкэҕэ ыытыллар үөрэҕириигэ судаарыстыбаннай уонна эригийиэннээҕи политика, учуутал миссиятын, күннээҕи тирээн турар проблемалар туһунан брифиҥҥэ кэпсэттилэр.

“Сыл бастыҥ учуутала” күрэх түмүгүнэн муҥутуур кыайыылааҕынан Павловскай орто оскуолатын химияҕа учуутала Новгородова Наталья Васильевна ааттанна. Лауреаттарынан Хорообут орто оскуолатын нуучча тылын уонна литэрэтиирэтин учуутала Гаврильева Изабелла Алексеевна, Майатааҕы лиссиэй нуучча тылын уонна литэрэтиирэтин учуутала Иосифова Мария Милентьевна, Бүтэйдээх орто оскуолатын математикаҕа уонна информатикаҕа учуутала Соловьева Наталья Анатольевна, Аллараа Бэстээх М.Е.Попов аатынан орто оскуолатын нуучча тылын уонна литэрэтиирэтин учуутала Федорова Татьяна Ефимовна буоллулар.

“Сыл бастыҥ эдэр педагогун” аатын Майатааҕы лиссиэй математикаҕа учуутала Никитина Анжелика Ариановна сүктэ. Чыамайыкы орто оскуолатын математикаҕа учуутала Захарова Прасковья Егоровна, Ороссолуода орто оскуолатын физикаҕа уонна математикаҕа учуутала Пономарева Сайыына Григорьевна, Аллараа Бэстээх 2 №-дээх орто оскуолатын физкультураҕа учуутала Скрябин Максим Александрович, Хара спортивнай орто оскуолатын историяҕа уонна обществознаниеҕа учуутала Эверстов Семен Васильевич лауреаттарынан буоллулар.

Күрэхтэри үрдүк таһымҥа тэрийэн ыыппыт И.Г. Игнатьев аатынан Хара спортивнай орто оскуолатын салалтатыгар, педагогическай кэллэктиибигэр, уруоктарга күрэх кыттыылаахтарын өйөөбүт, үчүгэй биллилэрин көрдөрбүт үөрэнээччилэригэр махтанабыт.

Күрэхтэр абсолютнай кыайыылаахтарыгар уонна лауреаттарыгар бириистэри туруорбут үөрэҕирии үлэһиттэрин профсоюһун улуустааҕы территориальнай тэрилтэтигэр (бэрэссэдээтэл Скрябин И.М.), Бурнашевтар, Брызгаловтар, Платоновтар, Марковтар, Васильевтар, Ноевтар, Шишигиннэр, Сидоровтар педагогическай династияларыгар улахан махталбытын тиэрдэбит.

“Сыл бастыҥ учуутала” күрэх муҥутуур кыайыылааҕар Павловскай орто оскуолатын химияҕа учууталыгар Новгородова Наталья Васильевнаҕа аны күһүн ыытыллар өрөспүүбүлүкэтээҕи күрэххэ, “Сыл бастыҥ эдэр педагога” күрэх бастыҥнарыгар Майатааҕы лиссиэй математикаҕа учууталыгар Никитина Анжелика Ариановнаҕа, Ороссолуода орто оскуолатын физикаҕа уонна математикаҕа учууталыгар Пономарева Сайыына Григорьевнаҕа, Хара спортивнай орто оскуолатын историяҕа уонна обществознаниеҕа учууталыгар Эверстов Семен Васильевичка “Илин Энэр үөрэҕирии уокуругун сыл бастыҥ эдэр учуутала” күрэххэ ситиһиилэри баҕарабыт.