Алтынньы 28-29 күннэригэр Арассыыйаҕа Аҕа дойдуну көмүскээччилэр, Улуу Кыайыы 80 сылын чэрчитинэн улуустааҕы үөрэх үлэһиттэрин 36-с ыспартакыйаадатыгар 400 тахса спортсмен кыттыыны ылла.

Үгэс буолбут биир эйгэ үлэһиттэрин тэрээһинэ Майа оҕо-ыччат успуорт оскуолатыгар, Ф.Г. Охлопков аатынан Майа орто оскуолатыгар уонна И.Г. Игнатьев аатынан Хара успуорт хайысхалаах орто оскуолатыгар ыытылынна.

Быйылгы күрэхтэһиигэ Павловскайдааҕы, Аллараа Бэстээхтээҕи, Төҥүлүтээҕи, Балыктаахтааҕы, Хорообуттааҕы, Табаҕатааҕы, Наахаратааҕы, Майатааҕы, Харатааҕы кустовой методическэй холбоһуктар уонна үөрэҕирии салалтата уопсайа 400 тахса кыттааччыны аҕаллылар.

Тэрээһин кыттыылаахтарын улуус баһылыгын бастакы солбуйааччы Гаврил Толстяков, үөрэҕирии салалтатын начаалынньыга Ирина Плотникова, үөрэх үлэһиттэрин идэлээх сойууһун бэрэссэдээтэлэ Иннокентий Скрябин эҕэрдэ тылларынан көрүстүлэр. Ыспартакыйаада кылаабынай судьуйата Филипп Стручков күрэхтэһии хаамыытын быһаарда. Успуорт бырааһынньыгын Алена Ефимова ырыанан, В.П. Ларионов аатынан Майа орто оскуолатын «Сыдьаай» ансаамбыл (сал. Розалия Шарина) «Тыҥ Хатыыта» үҥкүүнэн киэргэттилэр.

Үөрэх эйгэтин спортсменнара 2 күн устата волейболга, дуобат, саахымат, дартс, бинтиэпкэнэн ытыы, остуол тенниһэ, саха төрүт оҕунан ытыы, хабылык, хаамыска түһүмэхтэригэр бастыҥнары быһаардылар.

Ыспартакыйаада уопсай түмүгүнэн:

1 миэстэ - үөрэҕирии салалтатын хамаандата

2 миэстэ - Төҥүлүтээҕи КМХ хамаандата

3 миэстэ - Аллараа Бэстээхтээҕи КМХ хамаандата

Кыайбыт хамаандалар грамотанан, мэтээлинэн уонна бирииһинэн наҕараадаланнылар.