Балаҕан ыйын 29 күнүгэр 1 Семен Захарович Борисов аатынан Тыыллыма орто оскуолатын баазатыгар улуустааҕы эдэр педагогтар слеттара буолан ааста. Бу тэрээһини «Битим» эдэр педагогтар ассоциациата тэрийдэ. Уопсайа 6 оскуолаттан уонна Майатааҕы эбии үөрэхтээһин кииниттэн 31 эдэр педагог кыттыыны ыллылар.

Күн бастакы аҥарыгар Республиканскай конкурс кыайыылаахтара лайфхак, мастер-класстары көрдөрдүлэр. Эбиэттэн кэнниттэн бэрт бэһиэлэй, сэргэх квест-оонньуу ыытылынна. Слет түмүгэр полевой кухня тэриллэн санаа атастаһыыта ыытылынна. Эдэр педагогтар бэйэлэрин баҕа санааларанын эттилэр, маннык түмсүүлэр көрсүһүүлэр олус наадалааҕын бэлиэтээтилэр. Профессиональнай куонкурустарга бэлэмнэниигэ, грантовай куонкурустарга кыттарга методическэй көмө наадатын эттилэр. Лайфхактары истэн-көрөн, инникигэ саҥа бырайактары идея ылан санаалара өрө көтөҕүллэн тарҕастылар.

Түмүктүүр чааска улуус эдэр учууталлар ассоциациятын саҥа бэрэссэдээтэлин кытта билиһиннэрии буолла. Ол курдук В.П. Ларионов аатынан Майа орто оскуолатын история уонна обществознание учуутала Иннокентий Владимирович Кондаков ананна. Кини тутатына инники былаанын иһитиннэрдэ, сонун сүүрээннэри киллэрэр баҕатын биллэрдэ.

Тэрээһин кыттыылаахтар Тыыллыма орто оскуолатын коллективыгар, чуолаан дириэктэр Константин Анатольевич Захаровка улахан махталларын эттилэр.

#ГодПедагогаНаставника #ГПН_2023