Бүгүн, сэтинньи 1 күнүгэр, "Саамай ааҕар кылаас" бырайыак финалистара - улуус бастыҥ ахсыс кылаастарын хамаандалара брейн-ринг интеллектуальнай оонньууга муһуннулар.

Бу оонньууга кыттар үрдүк чиэскэ кулун тутар уонна алтынньы ыйдарга ыытыллыбыт хонтуруолунай үлэлэргэ бастыҥ көрдөрүүлээх В.П. Ларионов аатынан Майа орто оскуолатын 8а, 8б кылаастарын, Төхтүр, Павловскай 8а, 8б кылаастарын, Майа лицейын, Тумул, Баатара, Балыктаах, Наахара, Мэлдьэхси оскуолаларын хамаандалара тигистилэр. Тэрээһини улуустааҕы үөрэх дьаһалтатын информационнай-методическай отделын сүрүннүүр специалиһа Татьяна Михайловна Дмитриева салайан ыытта. Хамаандалар бырайыак испииһэгэр киирбит айымньылар ис хоһоонноругар сыһыаннаах 40 ыйытыыга хоруйдааннар илин-кэлин түһүстүлэр. Оонньуу 2 группанан ыытылынна.

Түмүккэ бастакы группаҕа В.П. Ларионов аатынан Майа орто оскуолатын 8б кылааһын хамаандата кыайыылаах, 8а иккис, Төхтүр оскуолатын хамаандата үһүс миэстэлэргэ тиксэннэр үөрдүлэр-көттүлэр.

Иккис группаҕа Баатара бастакы, Мэлдьэхси иккис, Тумул үһүс миэстэлэргэ тигистилэр.

Улуус ахсыс кылааһын үөрэнээччилэрэ бырайыак түмүктүүр тэрээһинигэр көхтөөхтүк кытыннылар. Бэһистэн саҕалаан аахпыт айымньылара инникитин ОГЭ, ЕГЭ туттаралларыгар көмөлөөх буолуоҕар эрэнэбит. Кинигэ ааҕыытын олохторугар арахсыспат аргыс оҥостон киэҥ билиилээх-көрүүлээх, сайдыылаах дьон буола улааталларыгар баҕарабыт!