Бэс ыйын 23 күнүгэр Майаҕа Ураһалаах алааска Ытык кырдьаҕастарга анаммыт “Аҕам дьон алгыһынан, кэнчээри ыччат айхалынан уруйданнын Ытык ыһыах” Үрүҥ тунах Ыһыах ыһылынна. Улууска үөрэҕирии тэриллибитэ 145 сылыгар улуус үөрэҕириигэ управлениетын түһүлгэтигэр Майа КМО-тун уонна үөрэҕирии салалтатын педагогическай үлэ бэтэрээннэрэ мустан  ыһыах ыстылар. Самаан сайыммытын көрсөр, өбүгэ үгэһинэн Аар айылҕабытыгар сүгүрүйэр уйгуну-быйаҥы түстээн алгысчыт аал-уоту оттон үрдүк айыылары арыылаах алаадьынан айах тутан көрдөһөн-ааттаһан алгыс сиэрин-туомун толордо. Бу үөрүүлээх күн алгыстаах түһүлгэҕэ улуус үөрэҕириигэ салалтатын начальнига Ирина Черкашина, “Ил Түмэн” государственнай мунньаҕын үөрэхтээһиҥҥэ уонна культураҕа комитетын председателэ Феодосия Габышева, СР үөрэҕин миниистирин солбуйааччыта Владимир Тихонов, СР үөрэҕирии салаатын хонтуруоллуур тэрилтэ салайааччыта Михаил Колмаков, Майа сэлиэнньэтин баһылыга Дмитрий Тихонов ыалдьыттаан педагогическай үлэ бэтэрээннэрин, үөрэх үлэһиттэрин эҕэрдэлээтилэр. Феодосия Габышева улуус үөрэҕириитин систематыгар өр сылларга бэриниилээхтик, таһаарыылаахтык үлэлиир Иннокентий Михайлович Скрябинҥа, Лира Ивановна Скрябинаҕа уонна Ларьяна Дмитриевна Соловьеваҕа “Ил Түмэн” государственнай мунньаҕын бочуотунай грамоталарын үөрүүлээх быһыыга туттарда. Ирина Черкашина педагогическай үлэ бэтэрээннэригэр өйдөбүнньүк хаартыскалары, анал бэлэхтэри туттарда.  

Зоя Герасимова