Мэҥэ Хаҥалас улууһун үөрэх управлениетын начаалынньыга Ирина Черкашина кыһыл көмүс мэтээлинэн бүтэрбит оҕолору чиэстиир тэрээһиҥҥэ быйылгы үөрэх дьылын үтүө түмүктэрин билиһиннэрдэ.

- Улууска быйылгы үөрэх дьылыгар 371 оҕо оскуоланы бүтэрдэ. Кинилэртэн 38 оҕо нуучча тылыгар биир кэлим эксээмэни 70-тан үрдүк баалга туттарда уонна "Үөрэххэ үрдүк ситиһиитин иһин" диэн мэтээлинэн наҕараадаланна. Бу - 15 оскуола: Балыктаах, Баатара, Бэдьимэ, Бүтэйдээх, В.П.Ларионов аатынан, Ф.Г.Охлопков аатынан, И.Г.Тимофеев аатынан Майа, Аллараа Бэстээх бастакы, иккис нүөмэрдээх, Павловскай, Табаҕа, Хаптаҕай, Чүүйэ, Төхтүр уонна Хорообут оскуолатын үөрэнээччилэрэ буолаллар. Мэтээлинэн бүтэрбит оҕолор ортолоругар Норуоттар икки ардыларынааҕы, Бүтүн Арассыыйатааҕы уонна өрөспүүбүлүкэтээҕи олимпиадалар, кэмпириэнсийэлэр, куонкурустар, күрэхтэһиилэр кыайыылаахтара, призердара бааллар. Биһиги улууспут өрөспүүбүлүкэ иһигэр муниципальнай оройуоннар хамаанданан зачеттарын рейтинынан Бүтүн Арассыыйатааҕы үөрэнээччилэр олимпиадаларын, ВорлдСкиллсЮниор өрөспүүбүлүкэтээҕи чөмпүйэнээт түмүктэринэн иккис, "Инникигэ хардыы" научнай-практическай кэмпириэнсийэ түмүгүнэн үһүс миэстэлээх.

Өрөспүүбүлүкэҕэ 26 100 бааллаах оҕолор ортолоругар биһиги улууспутуттан икки үөрэнээччи муҥутуур баалы ылбытын бэлиэтиир тоҕоостоох. Кеша Алексеев аатынан Хаптаҕай орто оскуолатыттан Лидия Иванова (учуутала Майя Гаврильевна Самсонова) уонна Ф.Г.Охлопков аатынан Майа орто оскуолатыттан Евгения Петрова (учуутала Ирина Гаврильевна Колосова) нуучча литературатыгар БКЭ-ҥэ 100 бааллаахтар. Ону сэргэ үрдүк баалы хас да үөрэнээччибит ылла: И.Г.Тимофеев аатынан Майатааҕы лиссиэйтэн обществознание предметигэр 99 бааллаах Олеся Антонова, Ф.Г.Охлопков аатынан Майа орто оскуолатыттан Жанна Титова нуучча литературатыгар 97, В.П.Ларионов аатынан Майа орто оскуолатыттан Анна Сергучева нуучча тылыгар 96 уонна С.З.Борисов аатынан Тыыллыма орто оскуолатыттан Иван Афанасьев​ информатикаҕа 95 бааллаах.

Источник: @gazetaerkeii