Бу сыл тохсунньу 14 күнүгэр үөрэх үлэһиттэрин профсоюһа 100 сыллаах үбүлүөйдээх сылын чэрчитинэн, ону тэҥэ илин эҥэр улуустарын күрэхтэһиитигэр хамаанданы сүүмэрдиир сыаллаах, үгэскэ кубулуйбут 30-с төгүлүн ыытыллар спартакиада буолан ааста.

Барыта 9 кустовой методическай холбоһук, үөрэх салалтата уонна транспортнай техникум, уопсайа 11 хамаанда, 300-тэн тахса үөрэхтээһин эйгэтигэр үлэлии сылдьар уонна үлэ бэтэрээннэрэ шахмат, дуобат, волейбол, хабылык, хаамыска, остуол тенниһэ уонна буулдьанан ытыыга бастыыр иһин күрэхтэстилэр.

Күрэхтэһии үөрүүлээх чааһыгар улуус мунньаҕын председателя Находкин Андрей Михайлович, үөрэх управлениетын начальнигын солбуйааччы Тарасов Николай Петрович эҕэрдэ тылларын, баҕа санааларын эттилэр. Үөрэх үлэһиттэрин профсоюһун председателя Андреев Степан Андреевич 30 сыл устата  спартакиадага кыттан элбэхтэ улуус чиэһин көмүскээбит педагогическай үлэ бэтэрээннэригэр Сыромятников Дмитрий Васильевичка уонна Захаров Анатолий Константиновичка  өйдөбүннүк бэлэхтэри туттарда.

Күрэхтэһии  түмүгүнэн 1 миэстэ Хорообут кустовой методическай холбоһук хамаандата, 2 миэстэ Хара КМО, 3 миэстэ Павловскай КМО-ра буоллулар уонна биирдиилээн көрүҥнэргэ сүүмэрдэммит хамаанда быһаарыллан кулун тутур ыйга ыаллыы сытар Уус-Алдан улууһугар күрэхтэһэ барыахтара.