Сыл бүтүүтэ улууспут оскуолаларын саамай чаҕылхай, инники күөҥҥэ сылдьар үөрэнээччилэрин Мэҥэ Хаҥалас улууһун баһылыгын Саҥа дьыллааҕы харыйатыгар ыҥыран чиэстиир үгэс олохтоммута ыраатта. Ол үөрүүлээх тэрээһин ахсынньы 25 күнүгэр Филипп Гаврильевич Охлопков аатынан Майа орто оскуолатыгар ыытылынна.

Бырааһынньык үөрэххэ, успуорка, уопсастыбаннай үлэҕэ үрдүк ситиһиилээх, оскуолаларын, улуустарын аатын ааттатар оҕолору түмтэ. Ыллыктааҕы ыралыыр, сырдыгы сырсар, туйгуну тутуһар улууспут киэн туттар оҕолорун, инники эрэллэрин муниципальнай оройуон баһылыга Дмитрий Тихонов эҕэрдэлээтэ.

Бу күн 2023 сыл түмүгүнэн «Мэҥэ Кэскилэ – 7» үөрэҕирии бырагырааматын чэрчитинэн «Гражданскай уонна патриотическэй иитии», «Удьуор утумун оскуолата», «Идэни талыы – олоххо сүрүн хардыы», «Төрөөбүт дойдум айылҕатын харыстыыбын», «Эт-хаан өттүнэн чэгиэн буолуу уонна доруобуйа култуурата», «Хомус” – оҕолору саха норуотун төрүт муусукатын эйгэтигэр уһуйуу» хайысхаларынан элбэх ситиһиилээх, кыайыылаах оҕолору чиэстээтилэр. Кинилэргэ туоһу суругу улуус баһылыга Дмитрий Тихонов, баһылыгы социальнай боппуруостарга уонна имиджевэй бэлиитикэҕэ солбуйааччы Альбина Григорьева, управлениелар салайааччылара туттардылар.

Бу күн оҕо-ыччат уопсастыбаннай хамсааһынын бастыҥнарын – «Мэҥэ кэскилэ» оҕо тэрилтэтин лиидэрдэрин уонна кинилэр салайааччыларын, өйөөччүлэрин үөрүүлээх быһыыга-майгыга бэлиэтээтилэр.

Михайлова А.Н., үөрэҕирии салалтатын кыл. специалиһа