Бүгүн, ахсынньы 27 күнүгэр, В.В. Местников аатынан Култуура сайдыытын киинигэр үтүө үгэс буолбут улуус баһылыгын Харыйата ыытылынна.

Үөрүүлээх тэрээһиҥҥэ улууспут нэһилиэктэриттэн 2025 сыл устата норуоттар икки ардыларынааҕы, бүттүүн Арассыыйа уонна Саха сирин араас таһымнаах күрэхтэрин, олимпиадаларын, научнай-практическай ааҕыыларын кыайыылаахтара, призердара, успуорт күрэхтэрин чулуулара, оскуола, улуус олоҕор араас тэрээһини көҕүлүүр бастыҥ эдэр көлүөнэ ыччаппыт муһунна.

Тэрээһин чэрчитининэн оҕолорго маастар-кылаас, хаартыскаҕа түһүү, араас оонньуулар, В.В. Местников аатынан Култуура киин артыыстарын саҥа дьыллааҕы туруоруута, эҕэрдэ кэнсиэр тэриллэн ыытылыннылар.

Үөрүүлээх чааска улуус баһылыга Дмитрий Тихонов, үөрэҕириигэ салалта салайааччыта Ирина Плотникова бүгүҥҥү үөрүүлээх күҥҥэ саргылаах Саҥа дьыл салаллан иһэринэн эҕэрдэлээн туран бастыҥнары чиэстээтилэр.

2025 сыл түмүгүнэн үөрэххэ, успуорка, айар үлэҕэ, “Патриотика”, “Үтүө санааланыы”, “Аныгы тыын” хайысхаларга, үрдүк ситиһиилээх бииртэн биир чаҕылхай, бастыҥ үөрэнээччилэр улуус баһылыгын туоһу суругунан наҕараадаланнылар, төрөппүттэригэр эҕэрдэ сурук туттарылынна итиэннэ “Мэҥэ Кэскилэ” патриотическай иитиигэ, сыл түмүгүнэн бастыҥ оҕо түмсүүлэрэ, оскуолалар, үлэһиттэр бэлиэтэннилэр.

Анал аат хаһаайыннарынан буоллулар:

“Оҕо хамсааһынын өйөөһүҥҥэ бастыҥ үлэлээх нэһилиэк баһылыга” - “Мэҥэ нэһилиэгэ” тыа сирин түөлбэтин баһылыга Ньургун Габышев.

“Оҕо хамсааһынын өйөөһүҥҥэ бастыҥ үлэлээх оскуола дириэктэрэ” – Н.В. Петров аатынан Дьабыыл орто оскуолатын дириэктэрэ Василий Петров.

«Иитэр үлэҕэ бастыҥ сүбэһит» – Ф.Г. Охлопков аатынан Майа орто оскуолатын дириэктэри иитэр үлэҕэ сүбэһит Кэскилээнэ Петрова.

“Оҕо хамсааһынын бырагыраамаларыгар бастыҥ үлэлээх оҕо уопсастыбаннай түмсүүтүн салайааччыта” - Мира Романова.

“Үөрэнээччилэр бэйэни салайыныыларын бастыҥ бэрэссэдээтэлэ” – И.Г. Игнатьев аатынан Харатааҕы успуорт орто уопсай үөрэхтээһин оскуолатын бэрэссэдээтэлэ Геннадий Васильев.

Оҕо-ыччат көҕүлээһинин өйүүр бастыҥ үлэлээх төрөппүтүнэн М.Е. Попов аатынан Аллараа Бэстээх орто оскуолатын төрөппүт киинин бэрэссэдээтэлэ Туйаара Прокопьевна Николаева ааттанна.

"Мэҥэ кэскилэ" оҕо хамсааһынын 2025 сыл түмүгүнэн бастыҥ үлэлээх оскуолалар оҕо уопсастыбаннай түмсүүлэринэн ааттаннылар:

1 миэстэ – Ф.Г. Охлопков аатынан Майа орто оскуолатын "Феникс” оҕо түмсүүтэ. Түмсүү бэрэссэдээтэлэ Дария Сидорова, салайааччы Яна Васильева.

2 миэстэ – И.И. Платонов аатынан Наахара орто оскуолатын “Тэтим” оҕо хамсааһына. Түмсүү бэрэссэдээтэлэ Тимир Луковцев, салайааччы Сахаяна Сидорова.

3 миэстэ – А.С. Шахурдин аатынан Төҥүлү орто оскуолатын “Өркөн” оҕо хамсааһына. Түмсүү бэрэссэдээтэлэ Анна Степанова, салайааччы Саргылана Петрова.

Бука бары наҕараадаламмыт үөрэнээччилэргэ, салайааччыларга, оскуолаларга эҕэрдэбитин тиэрдэбит, кэлэр 2026 сылга туйгун үөрэҕи, таһаарыылаах үлэни, үрдүк ситиһиини, чэгиэн доруобуйаны баҕарабыт!