Улуу Кыайыы 81 сылынан 100 биэрэстэҕэ чэпчэки атлетикаҕа сүүрүү ыам ыйын 6 күнүгэр Аллараа Бэстээх – Чүүйэ – Табаҕа – Майа – Аллараа Бэстээх маршрутунан быйыл 29-ус төгүлүн ситиһиилээхтик ыытылынна.

“100 километрга сүүрүү”  бырайыак авторынан Нестерев Андрей Андреевич, Аллараа Бэстээх №2  Г.М. Артемьев аатынан орто оскуола ОБЗР учуутала, “Факел” байыаннай патриотическай кулууп салайааччыта буолар. Быйыл Кыайыы күнүн көрсө чэпчэки атлетикаҕа уһун сүүрүүнү Г.М. Артемьев аатынан Аллараа Бэстээх №2 орто оскуолатын кэлэктиибэ (дириэктэр Колмакова О.В.), Улуустааҕы үөрэх салалтата (начальник Плотникова О.В.), Мэҥэ Хаҥалас улууһун ис дьыала уоргана (начальник Данилов С.П.) уонна Майа, Ходоро, Тараҕай нэһиликтэрин тыатын сирин дьаһалталара, оскуолаларын кэлэктииптэрэ көҕүлээһиннэринэн ыытылынна.

Барыта 86 кытааччы: Аллараа Бэстээх №2 Г.М. Артемьев аатынан орто, Аллараа Бэстээх М.Е. Попов аатынан орто, Павловскай орто, Балыктаах орто оскуоларыттан уонна Майатааҕы лиссиэй үөрэнээччилэрэ, учууталлара бөлөхтөргө хайдыһан дистанцияны күн устата сүүрдүлэр. Патриотическай бырайыак кыттыылаахтара Чүүйэҕэ, Табаҕаҕа, Майаҕа Аҕа Дойду Улуу сэриитин бэтэрээннэригэр ананар искибиэрдэргэ миитиннэргэ кытыннылар, паамытынньыктарга сүгүрүйэн гирляндалары уонна сибэкки дьөрбөлөрүн уурдулар. 100 километрдаах пробег улууспут киинигэр Аллараа Бэстээх Кыайыы болуоссатыгар анал тэрээһининэн түмүктэннэ.

Пробег дистанцията бэйэни уһун тыыннаах буолууга тургутуу эрэ буолбакка, хас биирдии кыттааччы Аҕа Дойду Улуу сэриитигэр тыыннарын толук уурбут хорсун буойуннарга, үлэ фронугар Кыайыыны уһансыбыттарга махталы биллэриитин тэрээһининэн буолар.

Өйдүүбүт! Умнубаппыт! Киэн туттабыт!