Ытыктабыллаах ветераннар, кэллиэгэлэр, күндү үөрэнээччилэр!

Аҕа дойду Улуу сэриитигэр немецкэй-фашистскай халабырдьыттары советскай норуот кыайыытын 80 сылынан итиитик-истиҥник эҕэрдэлиибин!

ХХ үйэ саамай хаан тохтуулаах сэриитэ хаарыйбатах ыала суох. Эдэркээн оҕолоруттан саас баттаабыт кырдьаҕастарыгар тиийэ дойду көмүскэлигэр туруммуттара. Ыраах Саха сириттэн 62 тыһыынча холкуостаах, булчут, көмүс хостооччу, интэлигиэнсийэ бэрэстэбиитэллэрэ фроҥҥа тиийэннэр бэргэн ытааччы, артиллерист, танкист, лүөччүк буолбуттара, Москваҕа, Ржевкэ, Сталинградтааҕы кыргыһыыга, Курскай тоҕойго, Ленинград блокадатыгар геройдуу кыргыспыттара, Берлиҥҥэ тиийэ өстөөҕү кыйдаабыттара. Кинилэртэн 31 тыһыынча киһи кыргыһыы толоонугар охтубуттара. «Барыта фронт туһугар! Барыта Кыайыы туһугар» диэн санаанан салайтаран тыылга оҕолор, дьахталлар, кырдьаҕастар аас-туор олоҕу аахсыбакка кыайыыны уһансыбыттара.

Мэҥэ-Хаҥалас оройуонуттан 112 учуутал фроҥҥа ыҥырыллан барбыта. Кинилэртэн 46 киһи сэрииттэн эргиллибэтэҕэ. Сэрии хара маҥнайгы күнүттэн оскуолалар выпускниктара тылланан дойдуларын көмүскүү барбыттара. Фронтовиктар оҕолорун хааччыйарга уопсастыбаннас көмөтүнэн интэринээттэр, уопсай дьиэлэр аһыллыбыттара, кинилэргэ анаан кыра да буоллар аһынан, таҥаһынан көмө оҥоһуллара. Иитэр-үөрэтэр үлэ барыта патриотическай тыыны уһугуннарыыга туһуламмыта. Учууталлар, норуот үөрэҕириитин отделын үлэһиттэрэ фроҥҥа анаан сылаас таҥас хомуйаллара, заемҥа суруйтараллара. Кинилэр «Советскай Саха сирэ» танковай колонна тутуутугар 2174 солкуобайы харчынан уонна анал уурууттан 5895 солкуобайы туттарбыттара, Оборуона пуондатыгар 26000 солкуобай харчы хомуйбуттара. Оскуолаларга 102 тимуровскай этэрээт тэриллэн 447 пионер 117 фронтовик дьиэ кэргэнигэр көмөнү оҥорбуттара. Үөрэнээччилэр, учууталлар холкуостарга куолас хомуйуутугар, бааһыналарга хаары типтэриигэ, оскуолаларга, интэринээттэргэ оттук маһы бэлэмнээһиҥҥэ субуотунньуктары быыстала суох ыыталлара. Сайыҥҥы өттүгэр оҕолор холкуос үлэтигэр улахан дьону кытта тэҥҥэ икки хараҥаны тэҥнээн үлэлииллэрэ.

Сэриини чиэстээхтик кыайбыт көлүөнэ дойдуну чөлүгэр түһэрбитэ, эйэлээх, нус-хас олоҕу оҕолоругар, сиэннэригэр бэлэхтээбитэ.

Кэм-кэрдии аастаҕын аайы Аҕа дойду Улуу сэриитин тыыннаах туоһулара аҕыйаан иһэллэр. Кинилэр сырдык ааттарын үйэтитии, кэлэр кэнчээри ыччакка тиэрдии – биһиги көлүөнэ ытык иэспит буолар. Сэрии алдьархайа ааҥнаабатын, ийэ сиргэ эйэ эрэ чэчириирин туһугар хас биирдиибит кыһаллыахтаахпыт. Төрөөбүт дойдубут чэлгийэ сайдарын туһугар күүспүтүн түмэн үлэлиэҕин, улууспутун, өрөспүүбүлүкэбитин сайыннарыаҕын.

Суох буоллун сэрии! Туругурдун эйэ!

Мэҥэ Хаҥалас улууһун үөрэҕириигэ салалтатын начаалынньыга

Гаврил Толстяков