Муус устар 5 күнүгэр Улуу Кыайыы 80 сылыгар ананар Мэҥэ Хаҥалас улууһун оскуолаларын үөрэнээччилэригэр 80 килэмиэтир (8 көс) уһуннаах сүүрүү 28 төгүлүн ыытылынна. Патриотическай бырайыак авторынан Аллараа Бэстээх 2-ис нүөмэрдээх орто оскуола “Дойдуга куттал суох буолуу уонна көмүскэл төрүттэрэ” предмет учуутала Андрей Андреевич Нестерев, көҕүлээччилэринэн уонна тэрийээччилэринэн Аллараа Бэстээх 2-ис нүөмэрдээх орто оскуола кэлэктиибэ (дириэктэр Колмакова О.В.), улуустааҕы үөрэх салалтата (начальник Толстяков Г.Н.) буолаллар. Быйылгы пробегка 23 оскуолаттан барыта 180 үөрэнээччи уонна педагогтар, салайааччылар кыттыыны ыллылар. Сүүрээччилэр 3 бөлөххө арахсан 3 маршрутунан сүүрдүлэр. Оскуолаларынан бөлөхтөрү Нестерев А.А., Аллараа Бэстээх 2-ис нүөмэрдээх оскуола учуутала, Эверстов В.С., Төҥүлү орто оскуолатын учуутала, Попов Н.С., Чүүйэ орто оскуолатын дириэктэрэ иилээн-саҕалаан салайдылар.

Ол курдук 1-кы бөлөххө 6 оскуола: Аллараа Бэстээх 2-ис нүөмэрдээх, Аллараа Бэстээх М.Е.Попов аатынан, Төхтүр, Павловскай, Рассолода уонна Бэдьимэ орто оскуолалара Төхтүр – Бэдьимэ – Майа – Аллараа Бэстээх маршрутунан сүүрдүлэр.

2-ис бөлөххө 9 оскуола: Төҥүлү, Балыктаах, Тумул, Дьабыыл, Майа лицейэ, Хара, Хорообут, Баатара орто оскуолалара уонна Бөкө сүрүн оскуолата Төҥүлү – Бэдьимэ – Майа – Аллараа Бэстээх маршрутунан сырыттылар.

3-үс бөлөхө 8 оскуола: Чүүйэ, Табаҕа, Алтан, Бүтэйдээх, Чыамайыкы, Тиэлиги, Наахара, Майа Ф.Г.Охлопков аатынан орто оскуолалар Чүүйэ – Табаҕа – Майа – Аллараа Бэстээх маршрутунан сүүрэн кэллилэр.

Патриотическай сүүрүү кыттыылаахтара Чүүйэҕэ, Бэдьимэҕэ, Табаҕаҕа, Майаҕа Аҕа Дойду Улуу сэриитин кыттыылаахтарыгар уонна тыыл бэтэрээннэригэр ананар искибиэрдэргэ сылдьан миитиннэргэ уонна паамытынньыктарга гирляндалары, сибэкки дьөрбөлөрүн уурууга кытыннылар. Миитиннэргэ олохтоох дьаһалта баһылыктара, үлэһиттэрэ, бэтэрээннэр сэбиэттэрин бэрэссэдээтэллэрэ үөрэнээччилэргэ анаан Улуу Кыайыы, сэрии уонна тыыл бэтэрээннэрин үйэтитии, сүгүрүйүү уонна махталлах буолууга кэс тылларын тириэртилэр.

Улуу Кыайыы 80 сылыгар ананар улуустааҕы чэпчэки сүүрүү кыттыылаахтара Аллараа Бэстээххэ бары тиийэннэр, маршруттарын толору толордулар. Кыайыы болуоссатыгар тэрээһин түмүктээһинигэр, Аҕа Дойду Улуу сэриитин кыттыылаахтарыгар сүгүрүйүү туомугар кытыннылар. Түмүктүүр миитиҥҥэ Мэҥэ Хаҥалас улууһун үөрэҕириитин начальнигын солбуйааччыта Петров М.В., Аллараа Бэстээх бэтэрээннэрин сэбиэтин бэрэссэдээтэлэ Оданец С.Ю., Аллараа Бэстээх 2-ис нүөмэрдээх оскуолатын аҕаларын сүбэтин бэрэссэдээтэлэ Лыткин И.И. сүүрүү кыттылаахтыргар ситиһиилэри баҕаран тыллары эттилэр. Тэрээһин үөрүүлээх чааһыгар бырайыагы көҕүлээччи оскуола дириэктэрэ Колмакова О.В. сүүрүү бары кыттыылаахтарыгар сертификаттары туттарда. Улуус үөрэнээччилэрин “Бастыҥнар хамсааһын” ааттарыттан быйыл патриотическай сүүрүүгэ 3-үс төгүлүн кыттар Дени Абубакаров легкоатлетическай пробег салгыы салҕанан барарыгар, сыллата кыттааччы ахсаана эбиллэ турарыгар баҕа санаатын эттэ.

Түмүккэ патриотическай бырайыак тэрийээччилэрэ улуустааҕы сүүрүүгэ күүс-көмө буолбут ГИБДД начальнигар Стручков А.А., улуус нэһилиэктэрин баһылыктарыгар барҕа махталларын биллэрдилэр.

Ити курдук Улуу Кыайыы 80 сылыгар анаран ыытыллыбыт Мэҥэ Хаҥалас улууһун үөрэнээччилэрин 80 килиэмиэтирдээх легкоатлетическай сүүрүү ситиһиилээхтик ыытыллан түмүктэннэ.

Аҕа Дойду Улуу сэриитин буойуннарын, тыыл бэтэрээннэрин, ЫТЫК ДЬОММУТУН! Өйдүүбүт! Сүгүрүйэбит! Киэн туттабыт!