Олунньу 28 күнүгэр Сэбиэскэй Сойуус Дьоруойа Ф.К.Попов аатынан Баатара орто оскуолатыгар “Баатара Баатырдара” өрөспүүбүлүкэтээҕи байыаннай-спортивнай оонньуулар уонна улуустааҕы “Ийэ дойдуга анаммыт олох” үөрэнээччилэр патриотическай ааҕыылара буолан аастылар.

Бу тэрээһиннэр Улуу Кыайыы 80 сылыгар ананан Баатара орто оскуолатын кадетскай кылаастарын офицер-иитээччитин, байыаннай дьайыы кыттыылаҕын, “Хорсунун иһин” уордьан кавалерын, хотугу норуоттар многоборьеларыгар успуорт маастарын Владислав Эдуардович Тарабукин сырдык аатын үйэтитэн үһүс төгүлүн үгүс кыттааччыны уонна ыалдьыты түмтэ. Оонньуулар үрдүк таһымнаахтык, Ийэ дойдуга бэриниилээх буолуу дириҥ ис хоһоонноох тыынынан ыытылыннылар.

Патриотическай тэрээһин Бочуоттаах ыалдьыттарынан Арассыыйа Дьоруойа, байыаннай дьайыы кыттыылааҕа Николай Евдокимов, Владислав Тарабукин ийэтэ Людмила Петровна сиэнинээн, Ил Түмэн дьокутааттара Андрей Находкин, Николай Бугаев, Ил Түмэн дьокутаата, “Барс” батальон бастакы хамандыыра Василий Егоров, байыаннай дьайыы кыттыылаахтара, биир дойдулаахтарбыт-учууталлар Николай Семенов, Сергей Громов, Гаян Харлампьев, байыаннай дьайыы кыттыылаахтарын өрөспүүбүлүкэтээҕи түмсүүлэрин салайааччылара Георгий Малышев, Петр Ксенофонтов, Никита Бубякин, уоппускаҕа кэлэ сылдьар, кадетскай кылаас выпускнига, капитан Петр Свешников, ДОСААФ эрэгийиэннээҕи отделениетын бэрэссэдээтэлин солбуйааччы, полковник Николай Гребенников, улуустааҕы бэтэрээннэр сэбиэттэрин бэрэссэдээтэлэ Евдокия Решетникова, Баатара орто оскуолатын кадетскай кылааһын выпускниктара буоллулар.

Байыаннай патриотическай күрэхтэһии Дьоруой Федор Кузьмич Попов пааматынньыгар гирлянда, Владислав Тарабукин мемориальнай дуоскатыгар сибэкки дьөрбөтүн уурууларынан, байыаннай дьайыыга охтубут Сыымах сэлиэнньэтин бастыҥ ыччата Петр Тастыгин сырдык аатын үйэтитэр өйдөбүнньүк дуосканы арыйыынан, дьоруойдары кэриэстээһин миитиннэринэн саҕаланна.

“Баатара Баатырда” оонньууларга түөрт улуустан сэттэ бастыҥ хамаанда кытынна. С.А.Новгородов аатынан Чурапчы орто оскуолатын “Беркут”, Уус Алдантан В.Н.Мигалкин аатынан Чараҥ орто оскуолатын “Сокол”, Амматтан В.М.Новиков-Күннүк Уурастыырап аатынан Эмис орто оскуолатын“Добун”, Аллараа Бэстээхтэн М.Е.Попов аатынан орто оскуолатын “Доблесть”, Аллараа Бэстээх 2-с нүөмэрдээх орто оскуолатын “Факел” уонна Баатара орто оскуолатын “Кадеты-1” бастакы уонна “Кадеты-2” хамаандалар күөн көрүстүлэр. Юнармеецтар хамаанданан уонна биирдиилээн бастыыр иһин строевой хаамыыга, Калашников автоматын ыһыыга-хомуйууга, автомат магазинын буулдьанан түргэнник иитиигэ, салгын саатынан бэргэнник ытыылаах биотлоҥҥа, гимнастическай турникка тардыныыга, Аҕа дойду килбиэннээх устуоруйатын тургутууга, наартаны ойууга уонна 800 м сүүрүүгэ күрэхтэстилэр. Бары кыттааччылар үчүгэй бэлэмнээх кэлэннэр күрэхтэһии тыҥааһыннаахтык барда.

Түмүккэ кыайыылааҕынан Баатара орто оскуолатын “Кадеты-1” патриотическай кулууп бастакы хамаандата (сал. А.Е.Сосин) таҕыста. Иккис миэстэ Аллараа Бэстээх 2 №-дээх орто оскуолатын “Факел” патриотическай кулуубун хамаандата (А.А.Нестерев), үһүс Аллараа Бэстээх М.Е.Попов аатынан орто оскуола “Доблесть” кулуубун хамаандата (Г.А.Харлампьев) буоллулар. Кыайбыт хамаандаларга кубоктар, сыаналаах кэмбиэрдэр туттарылыннылар. В.Э.Тарабукин ийэтэ Людмила Петровна олохтообут анал бирииһин наартаны ойууга бастаабыт Дима Гусев ‒ “Кадеты-2” уонна П.Н.Тастыгин аатынан анал бирииһин 800 миэтэрэҕэ сүүрүүгэ кыайбыт Георгий Новиков “Кадеты-1” хамаандалартан ылар чиэстэннилэр.

Улуустааҕы үөрэнээччилэр патриотическай ааҕыылара “Ийэ дойдуга анаммыт олох” уонна “Дьоруой аҕаларбыт суоларынан” сиэксийэлэринэн ыытылынна. 20 үөрэнээччи дакылааттары аахтылар. Хаптаҕай, Төҥүлү, Матта, В.П.Ларионов аатынан Майа, Бэдьимэ, Наахара, Аллараа Бэстээхтэн М.Е.Попов аатынан, Баатара орто оскуолаларыттан уонна Майатааҕы лиссиэйтэн кытыннылар. Ааҕыы лауреаттарынан Хаптаҕай орто оскуолатын 11 кылааһын үөрэнээччитэ Дарина Васильева “Васильев Семен Николаевич II ‒ Ильмень күөл кырыктаах кыргыһыытыгар охтубут саха саллаата”, Бэдьимэттэн 4 кылаас үөрэнээччитэ Эрсан Плюк “Мин төрүттэрим Ийэ дойду көмүскэлигэр”, Майатааҕы лиссиэйтэн 6 кылаас үөрэнээччитэ Валерий Кузьмин “Киэн туттар дьоннорум” дакылаатынан буоллулар.

Өрөспүүбүлүкэтээҕи байыаннай-патриотическай тэрээһин долгутуулаах түгэннэринэн Владислав Эдуардович Тарабукин хорсун аатын үйэтитэр “Дьоруой партата” бырайыак аһыллыыта уонна Арассыыйа Дьоруойа Николай Евдокимов үөрэнээччилэргэ “Хорсун быһыы” уруогун ыыппыта буоллулар. Дьоруой партатыгар бастакынан олорор чиэскэ Баатара орто оскуолатын 11 кылааһын үөрэнээччитэ Игорь Иванов үөрэх кыһатын бирикээһинэн ааттанна. Күрэхтэһии үөрүүлээх түгэннэригэр саха эстрадатын чаҕылхай сулуһа Эрхаан иэйиилээх ырыаларынан киэргэттэ.