Бу күннэргэ Майа В.П. Ларионов аатынан орто оскуола учууталлара Борисов Никандр Леонидович уонна Ефимов Александр Алексеевич Новгородскай уобалас Старорусскай оройуонугар “Вахта памяти” межрегиональнай поисковай экспедицияҕа сылдьаллар. Биир идэлээхтэрбит Васильев Ксенофонт Васильевич салайааччылаах "Саха Ильмень" своднай поисковай этэрээт састаабыгар киирэннэр Аҕа Дойду Улуу сэриитигэр тыынарын толук уурбут, кыргыһыы хонуутугар охтубут буойуттары көрдөөһүн үлэлэригэр сылдьаллар.

Экспедиция Саха Республикатын сэрии уонна тыыл ветераннарын ассоциациятын тэрийиитинэн “Знать. Чтить. Помнить” патриотическай бырайыак чэрчитинэн тэриллэн ыытыллар. "Саха Ильмень" своднай поисковай этэрээккэ Мэҥэ Хаҥалас, Чурапчы, Сунтаар, Ньурба уонна Таатта улуустарыттан барыта 24 эдэр ыччаттар киирбиттэр. Сургут куораттан кэлбит “Норд” этэрээти кытта бииргэ аатырбыт Ильмень күөл үрдүгэр турар Старай Русса Ретлё диэриэбинэтин таһыгар базаланан поисковай үлэлэргэ кыттыһаллар.

Борисов Никандр Леонидович уонна Ефимов Александр Алексеевич оскуолаҕа, улууска ыытыллар Аҕа дойдуга бэриниилээх буолууга иитэр үлэни көҕүлээччилэринэн, военно-патриотическай кулууп уонна юнармеецтар этэрээттэрин салайааччыларынан буолаллар.