Ытыктабыллаах кэллиэгэлэр - Мэҥэ Хаҥалас улууһун үөрэҕириитин тиһигин бары үлэһиттэрэ, педагогическай үлэ бэтэрээннэрэ!

Идэлээх бырааһынньыкпытынан – Аан дойдутааҕы Учуутал күнүнэн итиитик-истиҥник эҕэрдэлиибит! Уонунан тыһыынчанан ааҕыллар учууталлар, иитээччилэр, салайааччылар улууспут кэнчээри ыччатын билии- көрүү аартыгынан сирдээн олоххо бигэтик үктэнэллэригэр кыаҕы биэрбиттэрэ. Кинилэр дьулуурдаах үлэлэринэн Мэҥэ-Хаҥаласпыт үөрэҕириитин тиһигэ үс үйэни уҥуордаан сайдан кэллэ. Үөрэх тэрилтэлэригэр хас биирдии үгэс, хас биирдии саҥаны киллэрии инники күөнүгэр Учуутал турар. Кини күннэтэ толорор, сороҕор көстүбэт, сороҕор ситэ сыаналаммат дьаныардаах үлэтэ. Улахан буукубаттан суруллар Учууталлар баар буоланнар сахабыт норуота сайдар саҕахтаах, тапталлаах улууспут инникигэ эрэллээх.

Күн бүгүн «Ыччат уонна оҕолор» национальнай бырайыак, Үөрэҕирии сайдыытын стратегията, Саха Өрөспүүбүлүкэтин Ил Дархана А.С.Николаев 177 №-дээх ыйааҕа биһиги иннибитигэр стратегическай сыаллары туруораллар. «Мэҥэ кэскилэ-7» программабыт улууспутугар үөрэҕирии тиһигин сайдыытын торумнуур. Улуус баһылыга Д.И. Тихонов сыллата үөрэҕирии үлэһиттэрин иннигэр туруорар соруктарынан үлэбитин былааннаан ыытабыт.

2025 сыл улууспут педагогическай уопсастыбаннаһыгар бэлиэ сыл буолар. Ол курдук Мэҥэ Хаҥалас улууһугар методическай сулууспа тэриллибитэ 85 сылын бэлиэтиибит. Бу историческай дата чэрчитинэн үөрэх тэрилтэлэригэр Методическай марафоннар ыытылла тураллар.

«Барыта учууталтан тутулуктаах» диэн мээнэҕэ эппэттэр. Информация да үйэтигэр учуутал, иитээччи, уһуйааччы син биир үөрэтии-иитии тутаах фигуратынан хаалар. Бэйэбит билии- көрүү, сатабыл, кыах өттүнэн күрэстэһэр кыахтаах буолуохтаахпыт. Учуутал бэйэтэ умайдаҕына, үөрэнээччитин уматар. Үтүө холобурдар бааллар, педагогтар муниципальнай үөрэҕирии тиһигэ сайдыытыгар бэйэлэрин дьоһун кылааттарын киллэрэллэр.

Күндү кэллиэгэлэр!

Эһиги сүрэххит уонна дууһаҕыт сылааһын оҕоҕо аныыр, көмүс чыычаахтарбыт оҕо саастарын аргыһа буолар дьоллоох дьоҥҥут. Кэлэр кэнчээри ыччат туһугар түбүктээх үлэҕит ситиһиилээх буоллун, доруобай- чөл сылдьыҥ, дьоллоох- соргулаах буолуҥ!

«Мэҥэ Хаҥалас оройуонун үөрэҕириигэ салалтата” МКТ начаалынньыгын э.т. И.М.Плотникова

Үөрэҕирии үлэһиттэрин улуустааҕы территориальнай тэрилтэтин бэрэссэдээтэлэ И.М.Скрябин