Бүгүн, алтынньы 10 күнүгэр, Томтордооҕу “Мичээрэ” уһуйаан 50 сылыгар аналлаах тэрээһин буолла.

Сарсыарда өттүгэр уһуйаан иитээччилэрэ мустубут ыалдьыттарга бэйэлэрин үлэлэтэр бырайыактарын сырдаттылар, ол курдук Аркадий Дмитриевич Афонскай кыра саастаах оҕолору детсадка кэлэн адаптация сөптөөхтүк ааһалларыгар ханнык ньымалары туттарын кэпсээтэ, Эмма Эдуардовна Оконешникова айылҕалыын алтыһыы, экологическай иитии тула хас да бырайыагы холбуу тутан сырдатта, Виктория Ивановна Свинобоева саха халандаарынан оҕолору иитии-үөрэтии диэҥҥэ тохтоото. Кэлбит дьон, уһуйаан кырачаан оҕолору былааннаахтык, бары биир санаанан, айымньылаахтык үлэлии-хамсыы олороллорун бэлиэтээтилэр.

Тэрээһин иккис чааһа, үөрүүлээх быһыыга-майгыга, улууспут дьаһалтата, үөрэҕирии салалтата, үөрэх үлэһиттэрин идэлээх сэюзтара, нэһилиэк тэрилтэлэрэ, араас сылларга үлэлээбит бэтэрээннэр эҕэрдэлэрэ, оҕолор ырыаларынан-хоһооннорунан доҕуһуолланан, алгыс тыллаах кэрэ-бэлиэ күн ааста.