 Бүгүн улууспут 402 выпускнигар анаан тиһэх чуораан тыаһыаҕа. Кинилэр 11 сыл устата үөрэммит, билии- көрүү ылбыт оскуолаларыттан кынат үүннэрэн олох суолугар үктэнэллэр. Тиһэх чуораан тыаһыгар уйдаран оҕолор оскуолатааҕы сылларын, билии суолугар сирдээбит учууталларын, чугас доҕотторун, маҥнайгы тапталларын, үөрүүлэрин-хомолтолорун, кыайыыларын-хотторууларын өйдөөн ааһыахтара, кэрэ курус санааҕа ылларыахтара...
Тиһэх чуораан – олох биир кэрдиис кэмин түмүктээн саҥа үктэлгэ үктэнии буолар. Улуустааҕы үөрэҕирии салалтатын уонна тус бэйэм ааппыттан бу бэлиэ түгэнинэн барыгытын ис сүрэхпиттэн эҕэрдэлиибин.
Мэҥэ-Хаҥалас улууһун үөрэнээччилэрэ судаарыстыбаннай уонна эрэгийиэннээҕи бирэдимиэттэринэн олимпиадаларга, "Инникигэ хардыы" билим-быраактыка кэмпириэнсийэлэригэр, "Профессионаллар" хамсааһыҥҥа, успуорт күрэхтэһиилэригэр, айар күрэхтэргэ ситиһиилээхтик кытталлар. Онно биһиги выпускниктарбыт кылааттара улахан. Биһиги кинилэринэн киэн туттабыт.
Күндү выпускниктар!
Эһиги хас биирдиигит үөрэммит оскуолаҕыт устуоруйатыгар, учууталларгыт, бииргэ үөрэммит доҕотторгут өйдөрүгэр-санааларыгар чаҕылхай түгэннэри бэлэхтээн хааллардыгыт, бэйэҕит эмиэ сырдык өйдөбүллээх оскуоланы түмүктээн эрэргитигэр эрэнэбит. Эһигини инникигитигэр киэҥ суол, саҥаттан саҥа арыйыылар, бэлиэ түгэннэр күүтэллэр. Дьылҕаҕыт – бэйэҕит илиигитигэр! Бэйэҕит күүскүтүгэр, баҕа санааҕытыгар итэҕэйин, санаабыккыт сатаннын, толкуйдаабыккыт тобулуннун, кыайыы кынаттанын, үөрүү үктэллэнин!
Ытыктабыллаах төрөппүттэр!
Эһиги – саамай тулуурдаах, саамай кыһамньылаах дьон буолаҕыт. Күн сирин көрдөрбүт көмүс чыычаахтаргытын күннэтэ бүөбэйдээн, көрөн-истэн улаатыннаран көччөх гынан көтүтэн эрэҕит. Оҕолоргут эрэлгитин толордуннар, ааккытын ааттаттыннар, туйаххытын хатардыннар!
Ытыктабыллаах учууталлар!
Тиһэх чуораан бырааһынньыга – 11 сыллаах сыралаах үлэҕит түмүгэ. Хас биирдии уруокка, кылаас чааһыгар, иитэр дьарыктарга үөрэппиккит, уһуйбуккут, ииппиккит көстөр түгэнэ. Биэрбит билиигит, иҥэрбит сатабылларгыт үөрэнээччилэргитигэр туһалыы турдун, олохторугар бигэ тирэх буоллун! Кэнэҕэскитин выпускниктаргыт үөрэххэ-үлэҕэ, олоххо ситиһиилэрэ доргуччу дуорайдын, эһигини үөрдэ турдун, үлэҕитигэр кынаттаатын!
Бырааһынньыгынан!
Гаврил Толстяков,
Мэҥэ Хаҥалас улууһун үөрэҕириигэ салалтатын начальнига |
