Күндү выпускниктар, учууталлар уонна төрөппүттэр!

Эһигини улуустааҕы үөрэҕирии салалтатын аатыттан Тиһэх чуораан бырааһынньыгынан итиитик-истинник эҕэрдэлиибин!

Тиһэх чуораан бырааһынньыга – хас биирдии выпускник олох киэҥ аартыгар үктэнэр кэрэ-бэлиэ түгэнэ буолар. Бу күн оскуолаҕа, учууталларга, төрөппүттэргэ махтал күнэ, 11 сыл устата ылбыт билиини-көрүүнү, сатабылы, талааны дьон-сэргэ дьүүлүгэр таһаарыы күнэ.

Мэҥэ Хаҥалас улууһугар быйыл 383 выпускник оскуоланы бүтэрэр, олор истэригэр 42 туйгун үөрэнээччи кыһыл көмүс мэтээлгэ дьулуһар.

Сыллата биһиги выпускниктарбыт предметнэй олимпиадаларга, научнай-практическай конференцияларга, "Профессионаллар" чемпионаттарыгар ситиһиилээхтик кытталлар. Үөрэҕи тас өттүнэн спордунан дьарыктанан, айар сатабылларын сайыннаран араас таһымнаах күрэхтэргэ кыайыы-хотуу кынаттаналлар.

Убаастабыллаах кэллиэгэлэр!

Эһиэхэ таһаарыылаах үлэҕит, кэлэр көлүөнэ ыччакка тиэрдибит билиигит, сатабылгыт, сүрэххит сылааһын иһин махтанабын. Эһиги түстээбит кэскилгит кэнчээрилээх буоллун, арыйан биэрбит аартыккыт аһаҕас буоллун!

Күндү выпускниктар!

Эһиги бүгүн улахан олох суолугар үктэнэҕит. Бэйэҕит аналгытын таба тайанын, баҕарбыт баҕа санааларгыт туоллуннар, былааннаабыккыт барыта олоххо киирдин! Инникигит диэки эрэллээхтик хардыылаан, саҥаттан саҥа үрдэлгэ дабайын!

Ытыктабыллаах төрөппүттэр!

Күн сирин көрдөрөн, кыра бэйэлэрин бүөбэйдээн, иитэн-үөрэтэн, улаатыннаран таһаарбыт оҕолоргут дьиэ-кэргэнтэн, оскуолаттан куорсун анньынан көтөр кэмнэрэ кэллэ. Оҕолоргутугар эрэнин, ыраас санааҕытынан, истиҥ сыһыаҥҥытынан, ийэлии-аҕалыы тапталгытынан кинилэри араҥаччылыы-арчылыы турун!

Бырааһынньыгынан өссө төгүл эҕэрдэ! Доруобай-чэгиэн буолун, үөрүү үрдээтин, ситиһии сиэттистин, дьол тосхойдун! Барыгытыгар чаҕылхай күннээх эйэлээх халлааны баҕарабын.

Үөрэҕирии салалтатын начальнигын э.т.

Толстяков Гаврил Николаевич