 Муус устар 20-21 күннэригэр Мэҥэ Хаҥалас улууһун үөрэҕириигэ салалтатын уонна улуус үөрэҕин үлэһиттэрин Профсоюһун көҕүлээһиннэринэн үгэскэ кубулуйбут “Сыл бастыҥ иитээччитэ” күрэх ыытылынна. Күрэх сүрүн сыала иитээччи идэтин таһымын, үөрэх хаачыстыбатын үрдэтии.
Күрэх саҥа талааннары арыйар, айымньылаахтык үлэлиир иитээччилэри бэлиэтиир биир улахан педагогическай түһүлгэ буолар. Улууспут күрэҕин кыайыылаахтара Республика “Сыл бастыҥ иитээччи” күрэххэ ситиһиилээхтик кытталлар. Ол курдук былырыын, 2021 с. ахсынньы ыйга ыытыллыбыт күрэххэ Ороссолуода орто оскуолатын иитээччитэ Соловьева Варвара Анатольевна республиканскай конкурска лауреат үрдүк аатын ылбыта.
Быйылгы күрэххэ улууспут 12 үөрэх тэрилтэлэриттэн иитээччилэр, физкультурнай, музыкальнай салайааччылар, педагог-психолог күөн көрүстүлэр.
Күрэх бастакы түһүмэҕэ кэтэхтэн ыытылынна:
- Бастакы этапка кыттааччылар “Интернет ресурс” бэлэмнээтилэр. Манна видеоролик-визитка, “Мой успешный проект” уонна интернет портфолио итиэннэ оҕолору кытта дьарыктары видеоҕа түһэрэн ссылканан ыыппыттарын сыаналааһын буолла.
- Иккис этапка муус устар 20 күнүгэр зуум нөҥүө кыттааччылар педагогическай ситуациялары быһаардылар.
Бу түһүмэхтэр түмүктэринэн 6 иитээччи финалга киирдилэр:
- Баишева Авдотья Ивановна, Төхтүрдээҕи «Мичил» оҕону сайыннарар киин иитээччитэ
- Кривогорницына Сардана Ивановна, Хаптаҕайдааҕы «Хомусчаан» оҕону сайыннарар киин иитээччитэ
- Маркова Светлана Николаевна, Бүтэйдээхтээҕи «Чэчир» оҕону сайыннарар киин иитээччитэ
- Осипова Ольга Анатольевна, Майатааҕы «Мичил» оҕону сайыннарар киин иитээччитэ
- Павлова Сардана Александровна, Аллараа Бэстээхтээҕи «Сказка» уһуйаан иитээччитэ
- Попова Раиса Анатольевна, Майатааҕы «Кэнчээри» оҕону сайыннарар киин иитээччитэ
Муҥутуур кыайыылааҕы быһаарар бүтэһик түһүмэх муус устар 21 күнүгэр Төхтүрдээҕи “Мичил” оҕону сайыннарар кииҥҥэ ыытылынна. Финалга киирбит 6 кыттааччы төгүрүк остуол тула оскуола иннинээҕи саастаах оҕолору иитиигэ-үөрэтиигэ баар араас боппуруостар тула аһаҕастык кэпсэттилэр, төрөөбүт тылынан оҕолорго кинигэни ааҕыы туһунан бэйэлэрин санааларын үллэһиннилэр уонна маастар-кылаас көрдөрдүлэр. Маастар-кылаастарга педагогтар эрдэ бэлэмнээн кэлбит темаларынан бэйэлэрин опыттарын кэпсээтилэр.
Үөрүүлээх быһыыга-майгыга күрэх кыайыылааҕын уонна лауреаттарын улуус үөрэҕириигэ салалтатын начальнига Ирина Васильевна Черкашина эҕэрдэлээтэ уонна наҕараадалары туттарда. Күрэх түмүгэр түһүмэхтэри барытын ситиһиилээхтик ааһан муҥутуур кыайыылааҕынан Майатааҕы “Мичил” оҕону сайыннарар киин педагог-психолога, Осипова Ольга Анатольевна ааттанна уонна быйыл сайын “Сыл бастыҥ итээччитэ” республиканскай конкурс түһүмэҕэр кыттар чиэскэ тигистэ.
| 
