Ахсынньы 8-9 күннэригэр Улуустааҕы “Снежный барс” байыаннай спортивнай оонньуулар Аҕа Дойду Геройдарын күннэригэр анаммыт декада былаанынан икки группанан ыытылыннылар.

Улуус оскуолаларын военно-патриотическай кулууптарын хамаандалара Аҕа Дойду килбиэннээх историятын билиигэ, строевой хаамыыны көрүүгэ, сыалы ытыыга, силовой комплексы оҥорууга, түргэнник автоматы ыһыыга-хомуйууга, магазинын ботуруоннарынан иитиигэ уонна военизированнай эстафетаҕа күрэхтэстилэр.

Бастакы группа оскуолалар күрэхтэһиилэрэ ахсынньы 9 күнүгэр, Аҕа Дойду Геройдарын күнүгэр Советскай Союз Героя Ф.К. Попов аатынан Баатара орто оскуолатыгар үрдүк таһымҥа ыытылынна. Майа В.П. Ларионов аатынан, Майа Ф.Г. Охлопков аатынан, Майа лицейин, Аллараа Бэстээх №2, Павловскай, Хаптаҕай, Төҥүлү уонна Баатара орто оскуолаларын хамаандалара кыттыыны ыллылар.

Быйылгы “Снежнай барс” улуустааҕы байыаннай спортивнай оонньуулар ураты кэрэхсэбиллээх түгэнинэн Республикабыт Аҕа баһылыга - Ил Дархан А.С. Николаев, Россия Героя А.Г. Колесов, үөрэх уонна наука министра Н.А. Соколова, Мэҥэ Хаҥалас улууһун баһылыга Д.И. Тихонов күрэхтэһии үөрүүлээх аһыллыытыгар кыттыылара, эдэр армеецтарга кэс тылларын этиилэрэ буолла.

Икки күннээх тыҥааһыннаах күрэх түмүгүнэн бастакы группаҕа кыайыылаахтарынан буоллулар:

1 миэстэ – Аллараа Бэстээх №2 орто оскуолатын “Факел” ВПК;
2 миэстэ – Майа Ф.Г. Охлопков аатынан орто оскуолатын ВПК “Болот”;
3 миэстэ – Майа В.П. Ларионов аатынан орто оскуолатын ВПК “Беркут”.

Байыаннай спортивнай оонньуу иккис группа оскуолаларын хамаандаларыгар Советскай Союз Героя Федор Кузьмич Попов төрөөбүт күнүгэр, ахсынньы 8 чыыһылатыгар В.В. Скрябин аатынан Чүүйэ орто оскуолатыгар ыытылынна. Наахара, Тиэлиги, Хорообут, Чыамайыкы, Матта, Бэдьимэ, Бүтэйдээх, Ороссолуода, Чүүйэ орто оскуолаларын военно-патриоическай кулууптарын хамаандалара кытыннылар. Уопсай түмүккэ кыайыылаахтарынан таҕыстылар:

1 миэстэ - Наахара орто оскуолатын ВПК “Эрэл”;
2 миэстэ - Бүтэйдээх орто оскуолатын ВПК “Хоһуун”;
3 миэстэ - Ороссолуода орто оскуолатын ВПК “Отвага”.

Кыайыылаах оскуолалар военно-патриотическай кулууптарын хамаандалара олунньу ыйга улуустааҕы финалга муҥутуур кыайыылаах хамаанда буоларга күрэхтэһиэхтэрэ.

Н.П. Тарасов, үөрэҕирии салалтатын кыл. испэсэлииһэ