Муус устар 25 күнүгэр А.С.Шахурдин аатынан Төҥүлү орто оскуолатын учууталлара Баишева Анастасия Николаевна, Слепцова Марта Сталовна, Плотникова Саргылана Дмитриевна "Саха тылын уонна литературатын үөрэтиигэ саҥа ньымалары туһаныы" диэн ааттаах улуустааҕы семинары үрдүк тэрээһиннээхтик ыыттылар.

Саргылана Плотникова "Үс... Сэттэ... Тоҕус..." диэн 6-с кылааска саха тылын уруогар, Марта Слепцова "Аат тугу кэпсиирий?" диэн темаҕа 8-с кылааска литература уруогар ааҕыы сатабылларын сайыннарар ньымалары аһаҕас уруоктарга көрдөрдүлэр. Анастасия Баишеваа төрөөбүт тылы, литератураны үөрэтиигэ мультимедийнай ньымалары туһаныы саҥа көрүҥнэрин туһунан маастар-кылаас ыытта, интерактивнай былакааттары оҥорон уруоктарга хайдах туһаныахха сөбүн учууталларга үөрэттэ, практическай дьарык оҥордо. Маны таһынан олимпиадаларга, экзаменнарга оҕо үрдүк таһымнаахтык, ситиһиилээхтик кыттарыгар бэлэмнииргэ үлэлэрин уопутун үллэһиннилэр.

Семинарга улууспут 15 оскуолатыттан 19 учуутал кэлэн кыттыыны ылан, уруоктары көрөн, маастар-кылааһы истэн, куйаар ситиминэн интерактивнай былакааты оҥорорго үөрэнэн, үөрэх хаамыытын тупсарарга саҥа санаалардаах, сонун идиэйэлэрдээх бардылар.