Сэтинньи 23 күнүгэр саха тылын, литературатын уонна култууратын учууталларын II ӨРӨСПҮҮБҮЛҮКЭТЭЭҔИ СИЙИЭҺИН "Саха тылын билиҥҥи туруга уонна кэскилэ" диэн сүрүн мунньаҕа буолла. Сүрүн дакылааттары уонна этиилэри иһиттибит. Сахабыт тыла кэскиллээх буоларыгар ис кыаҕы таба туһанарга диэн этиини сэҥээрэ иһиттибит. Мунньах түмүгэр өр сылларга таһаарыылаах үлэлэрин иһин бастыҥ учууталлары наҕараадалаатылар. Мэҥэ Хаҥалас улууһун дэлэгээтигэр, И.Г. Тимофеев аатынан Майа лицейин саха тылын уонна литературатын учууталыгар, Слободчикова Тамара Егоровнаҕа "Саха Республикатын үтүөлээх учуутала " бочуоттаах аат иҥэрилиннэ. Тамара Егоровна сыралаах үлэтэ сыаналаммытынан үөрэбит уонна киэн туттабыт.

"Төрөөбүт тылынан иитии-үөрэтии" диэн тиэмэҕэ түһүлгэнэн үлэ тэрилиннэ. Дэлэгээттэр түһүлгэлэргэ арахсан үлэлээн, санаа атастаһан, этиилэрин этинэн көхтөөх кыттыыны ыллылар.

Сийиэс иккис күнэ сынньалаҥ тэрээһининэн түмүктэннэ. Дэлэгээттэр "Сарсыарда. Уу чуумпуга..." диэн испэктээккэ сырыттылар.

Ольга Обутова, информационнай-методическэй отдел кылаабынай специалиһэ