Алтынньы ый 18 күнүгэр “Кэрэли” улуустааҕы оҕону эбии үөрэхтээһин киинигэр Саха КВН хамсааһына 20 сыллаах үбүлүөйүн чэрчитинэн “Саха КВН биир күнэ” семинар бэрт сэргэхтик ааста. Уопсайа улууспутут 12 оскуолатыттан 92 оҕо кыттыыны ылла. Семинары Г.И. Охлопков салайааччылаах күүстээх хамаанда кэлэн иилээн-саҕалаан ыытта.

Күн бастакы аҥарыгар Геннадий Иванович “Саха КВН” республикаҕа сайдан кэлбит историятын, төрүттээччилэрин, умнуллубат тугэннэрин туһунан, ону тэҥэ бу хамсааһынтан кынаттанан үүнэн тахсыбыт ыччаты кытта билиһиннэрдэ, араас кэмнээҕи видеороликтары көрдөрдө.  “Океанская Лига КВН” күрэҕэр өрөспүүбүлүкэ сүүмэрдэммит хамаандатын бэлэмниир сүрүн салайааччы А.Т. Егоров КВН оонньуу ис хоһоонун, ханнык түһүмэхтэртэн, туох ирдэбил турарын сиһилии кэпсээтэ. Бүлүү улууһун Халбаакы орто оскуолатын дириэктэрэ, “Муммуттар” оскуола оҕолорун хамаандатын салайааччыта Г.В. Иннокентьев үгүс сүбэ-ама биэрдэ, кистэлэҥнэри арыйда. Ф.Г. Охлопков аатынан Майа орто оскуолатын выпускнига, “Саҥа кэм” хамаанда сүрүн оонньооччута, “Мэҥэ кэскилэ” улустааҕы оҕо хамсааһынын 2018-2019 с. лидеры солбуйааччы Игорь Эверстов бу хамсааһын нөҥүө киһи быһыытынан сайдан тахсарга туох кыаҕы биэрэрин туһунан кэпсээбитэ оҕолору угуйда, интэриэстэрин тарта.

Күн иккис аҥарыгар кыттааччылар 7 хамаандаҕа арахсан, тугу билбиттэрин-көрбүттэрин чиҥэтэн, КВН биир түһүмэҕин кылгас бириэмэҕэ тута бэлэмнэнэн дьон иннигэр тахсан оонньоон көрдөрдүлэр. Онтон салайааччылары кытта  Г.И. Охлопков төгүрүк остуол тула олорон саҥа сүүрээннэр, былааннар, ирдэбиллэр туһунан кэпсэтии таһаарда, ыйытыктарга хоруйдаата. Күн түмүгүнэн хас биирдии кыттааччыга үөрэх барбытын туһунан сертификат уонна үбүлүөйдээх сыл значоктара туттарылыннылар. Оҕолор элбэҕи билэн-көрөн, саҥа доҕоттордонон олус астынан, сүргэлэрэ көтөҕүллэн, сэтинньи ыйга буолар улуустааҕы “Саха КВН” күрэххэ үрдүк таһымнаах оонньуу көрдөрөр былааннаах тарҕастылар.

Монастырева М.Д.