Майатааҕы «Кэнчээри” оҕону сайыннарар кииҥҥэ бу дьыл алтынньы 1 күнүгэр оҕолорго анаан биир улахан умнуллубат, суолталаах түгэн буолан ааста.

Ол курдук, “Хорсуннар өлбөт-сүппэт аналлаахтар» - диэн үүнэр көлүөнэҕэ, кэнчээри ыччаппытыгар төрөөбүт дойдуга муҥура суох бэриниилээх, сахалыы сэмэй майгылаах, сатабыллаах, инникигэ эрэллээх үтүө дьон буолан тахсалларын туһугар анаммыт тэрээһиҥҥэ Сахалар киэҥ туттар, бойобуой сырыыларын холобур оҥостор “Арассыыйа Дьоруойа” үрдүк аатын сүкпүт, “Алеша”- таанка экипааһын чилиэнэ, ефрейтор – Филипп Александрович Евсеев кэргэнинээн Светлана Александровналыын уонна Саха Өрөспүүбүлүкэтин ыччат министиэристибэтин ыччаты патриотическай иитиигэ отдел салайааччыта, Бойобуой дьайыы кыттыылааҕа, биир дойдулаахпыт - Николай Мирославович Семенов ыалдьыттаатылар.

Бу истиҥ көрсүһүүттэн уһуйааммыт иитиллээччилэрэ Ийэ дойдуну көмүскүүр, күүстээх санаалаах, хорсун дьоннор туһунан элбэҕи биллилэр. Кэпсэтиигэ кыттыһан үөрүүлэрин үллэһиннилэр.

Түмүккэ оҕолор бэйэлэрин илиилэрин сылааһынан оҥорбут «Туллук – эйэ уонна үтүө санаа” бэлиэлэри бэлэх ууннулар, өйдөбүнньүк хаартыскаҕа түстүлэр.

Буойун дьоммут төрөөбүт дойдуга муҥура суох бэриниилэрэ - эһиэхэ үтүө холобур буоллун.