Сэтинньи 24 күнүгэр Нөөрүктээйи нэһилиэгин сынньалаҥ киинигэр оскуола оҕолорун 19-с республикатааҕы «Саха КВН» оонньууларын улуустааҕы күрэҕэ буолан ааста.

Күрэхтэһии «Cаха КВН» хамсааhынын салгыы сайыннарар, саха ыччата төрөөбүт тылын туттар эйгэтин кэҥэтэр, илин эҥэрдээҕи Саха КВН оонньууларыгар кыттар хамаандалары сүүмэрдиир сыаллаах-соруктаах ыытылынна.

Оонньуу сүрүн тэрийээччилэринэн буоллулар: Мэҥэ-Хаҥалас улууһун үөрэҕириигэ салалтата, Оҕону эбии үөрэхтээһин киинин иһинэн “Мэҥэ-Кэскилэ” улуустааҕы оҕо общественнай хамсааhына.

Быйылгы күрэххэ улууспут 8 саамай көхтөөх, түмсүүлээх хамаандалара кыайыылаах ааты ылаары кииристилэр: “Киэсэ сиэттэрэ” (Кеша Алексеев аатынан Хаптаҕай орто оскуолата), “Абытайдар” (Е.Д.Кычкин аатынан Матта орто оскуолата), “2J” (Балыктаах орто оскуолата), “Халлаан дьоно” (И.М.Романов аатынан Төхтүр орто оскуолата), “Чаҕыл” (Ф.Г.Охлопков аатынан Майа орто оскуолата), “Светлячки” (З.С.Борисов аатынан Тыыллыма орто оскуолата), “Чукурушки” (В.Н.Оконешников аатынан Павловскай орто оскуолата), “Уучукуруктар” (А-Бэстээх 1№- дээх орто оскуолата).

Улуустааҕы күрэхпит дьүүллүүр сүбэтинэн үлэлээтилэр Саха Республикатын “Дьулуур” оҕо биир сомоҕо хамсааһынын бэрэссэдээтэлэ, “Саха КВН лигата” ыччат общественнай тэрилтэтин салайааччыта Охлопков Геннадий Иванович, “Сборная ЯГСХА” хамаанда тутаах оонньооччута Василий Гаврильевич Марков, “Уолаттар” Саха КВН хамаанда тутаах оонньооччута Тарасов Айсен Тарасович, Саха Республикатын “Саха КВН лигата” общественнай тэрилтэтин бэрэссэдээтэлин солбуйааччы Марков Игорь Алексеевич, “Мэнэ Кэскилэ” улуустааҕы оҕо общественнай түмсүүтүн салайааччыта Монастырева Марианна Дмитриевна.

Оонньуу түөрт түһүмэҕинэн барда: «Эҕэрдэлэһии», «Биир нүөмэр түһүмэҕэ», «Ыйытынньык», “Дьиэтээҕи сорудах”. Тыҥааһыннаах киирсии түмүгүнэн кыайыылаах үрдүк аатын эрэллээхтик “Абытайдар” (Матта) суктэ, иккис миэстэҕэ «Чаҕыл» (Майа) хамаандата таҕыста, үһүс бириистээх миэстэҕэ “Халлаан дьоно” (Төхтүр) миэстэҕэ тигистилэр. Күрэх түмүгүнэн анал ааттар иҥэрилиннилэр: «Көрдөөх көкөт» - Денис Платонов  (Чаҕыл Майа), “Күн Күлүүк” – Таня Пермякова (“Абытайдар” Матта), “Саха КВН эрэлэ” – “Светлячки” (Тыыллыма) хамаандата, “Бастыҥ дьиэтээҕи сорудах” – “Уучукуруктар” (А-Бэстээх), “Бастыҥ эҕэрдэлэһии”– “2J” (Матта), “Алтан чуораан” – “Киэсэ сиэттэрэ” (Хаптаҕай), “Көрөөөччүлэр биһирэбиллэрэ” – “Чукурушки” хамаанда (Павловскай).

Сэтинньи 30, ахсынньы 1 күннэригэр Уус-Алдан улууһун Бороҕон нэһилиэгэр ыытыллар илин эҥэрдээҕи Саха КВН оонньууларыгар биһиги улуустан "Абытайдар", уонна “Чаҕыл” хамаандалара салгыы кыттыыны ылыахтара.

Марианна Монастырева, оҕо общественнай хамсааhынын көҕүлээччитэ