Тохсунньу 20 күнүгэр Майаҕа Мэҥэ-Хаҥалас улууһун үөрэҕин үлэһиттэрин ыспартакыйаадата үрдүк таһымҥа ыытылынна. Тэрээһини улуус үөрэҕин салалтата, үөрэх үлэһиттэрин боропсойууһа тэрийэн ыыттылар. Сыллата ыытыллар ыспартакыйаада сыалынан, Илин эҥэр улуустарыгар ыытыллар үөрэх үлэһиттэрин ыспартакыйаадатыгар кыттар хамаанданы сүүмэрдээһин, бэлэмнээһин буолар. Сыллата уопуттаах спортсменнар ыччат дьону успуорка көҕүлүүллэр. Онон бу күрэхтэһии ыытыллан эдэрдэр успуорка дьулуһалларыгар, талаһалларыгар үктэл буолар.

Тэрээһин үөрүүлээх аһыллыытыгар улуустааҕы үөрэх управлениетын начаалынньыгын солбуйааччыта Николай Тарасов эҕэрдэлээн туран, Павловскай орто оскуолатын физкультураҕа учууталыгар СР үөрэҕириитин туйгуна бэлиэни үөрүүлээх быһыыга туттарда. Улуустааҕы успуорт управлениетын начаалынньыга Александр Брызгалов, үбүлүөйдэрин бэлиэтээбит ветеран педогогтарга Иван Семенович Филипповка, Михаил Дмитриевич Шариҥҥа, Иннокентий Максимович Березкиҥҥа бочуотунай грамоталары, үөрэх үлэһиттэрин боропсойууһун бэрэссэдээтэлэ Степан Андреев Савва Петрович Аргуновка, Виталий Михайлович Пестряковка махтал суруктары туттардылар. Улууска үөрэх үлэһиттэрин ыспартакыйаадатыгар 30-ча сыл үлэлэспит, тэрийсибит педагогтарга, бастыҥ үлэһиттэргэ олор истэригэр Василиса Кузьминична Никифороваҕа, Ульяна Спиридоновна Шишигинаҕа,Анатолий Константинович Захаровка, Дмитрий Васильевич Сыромятников-Кэрэһиннээххэ, Иннокентий Михайлович Скрябиҥҥэ, Айна Кимовна Поповаҕа, Наталья Иннокентьевна Соловьеваҕа, Еремей Михайлович Куприяновка о.д.а үөрэх үлэһиттэрин боропсойууһун махтал суруктарын, өйдөбүнньүк бэлэхтэрин туттардылар.

Тэрийээччилэр сыллата күрэхтэһии көрүҥнэрин көрөн уларытыы киллэрэллэр. Ааспыт сылга остуол оонньууларыттан хабылык, хаамыска баар эбит буоллаҕына, быйыл дартс көрүҥэ киирэн кыттааччылар сэҥээриилэрин ылбыт. Ыспартакыйаадаҕа уопсайа 11 хамаанда 320-тэн тахса кыттааччы 6 сымнаҕас көрүҥҥэ күөн көрүстэ. Тыҥааһыннаах ыспартакыйаада түмүгүнэн үс бириистээх миэстэҕэ Хара нэһилиэгин КМО-та, иккис Төҥүлү уонна үһүс үөрэх управлениетын хамаандата тиксэн компьютернай оборудовние сэртэпикээттэрин туттулар. Төрдүс миэстэни хааччыммыт Павловскай КМО-та морозильнай ларь, бэһис Хорообут КМО-та музыкальнай киин уонна алтыс Майалар электромясорубка бириистэринэн бэлиэтэннилэр.