2023 сыл олунньу 18 күнүгэр үгэскэ кубулуйбут XXXIV–c үөрэх үлэһиттэрин спартакиадата бэрт тэрээһиннээхтик Манчаары спортивнай комплексыгар буолан ааста.

Уопсайа 10 кустовой холбоһук хамаандалара дуобат, саахымат, остуол тенниһэ, салгын саатынан ытыы, дартс уонна волейбол (сахавабол) курдук көрүҥнэргэ биир кэлим күрэхтэстилэр. Быйылгы спартакиадаҕа көрүҥ аайы кустовой холбоһуктан үөрэх тэрилтэтин салайааччыта эбэтэр солбуйааччыта кыттыыта булгуччулаах буолла. Күрэхтэһии үөрүүлээх чааһыгар улуустааҕы үөрэх салалтатын салайааччыта Николай Никифоров уонна улуус үөрэҕин үлэһиттэрин профсоюһун председателя Иннокентий Скрябин эҕэрдэ тылларын эттилэр уонна дойдуга Педагог уонна наставник, республикаҕа спортивнай хамсааһын тэриллибитэ 100 сылларынан спортсменнарга, спорт бэтэрээннэригэр улуус Аҕа баһылыгын, үөрэх үлэһиттэрин республикатааҕы комитетын, улуус үөрэҕин салалтатын бочуотунай грамоталарын туттардылар.

Күрэхтэһии түмүгүнэн, 1 миэстэни Төҥүлү кустовой холбоһуга, салайааччы Сотников Вячеслав Егорович, 2 миэстэни Майа оскуолаларын кустовой холбоһуга, салайааччы Толстяков Гаврил Николаевич уонна 3 миэстэни Үөрэх салалтатын кустовой холбоһуга буоллулар. Кыайыылаахтар 6 миэстэҕэ дылы сыаналаах бириистэринэн наҕараадаланнылар.

И. Скрябин, Мэҥэ Хаҥалас үөрэҕин үлэһиттэрин профсоюһун председателя