Балаҕан ыйын 12 күнүгэр «Уруоктар уонна дьарыктар көдьүүстэрин үрдэтии – үөрэх хаачыстыбатын тупсарыы усулуобуйата» балаҕан ыйынааҕы үөрэҕирии үлэһиттэрин сүбэ мунньаҕын иккис күнүгэр «Билии-көрүү үтүөҕэ сирдээтин» искибиэр үөрүүлээх арыллыыта буолла.

2020 сыл алтынньы ыйтан саҕалаан саҥа өйдөбүнньүк эбийиэгэ улуус үөрэҕин үлэһиттэрин, биир идэлээхтэр көҕүлээһиннэринэн уонна олохтоох көҕүлээһиннэри өйүүр бырагыраама чэрчитинэн тупсарыы үлэтэ ыытыллан олоххо киирдэ.

Искибиэри арыйар үөрүүлээх түгэҥҥэ мустубут дьону улуус баһылыга Дмитрий Тихонов, СӨ үөрэҕин уонна билимин миниистирин бастакы солбуйааччы Ньургун Павлов, өр сылларга улуус үөрэҕирии үлэһиттэрин идэлээх сойуустарын бэрэссэдээтэлинэн үлэлээбит педагогическай үлэ уонна СӨ идэлээх сойуустарын хамсааһынын бэтэрээнэ, РФ орто үөрэҕин ситимин Бочуоттаах үлэһитэ, СӨ үөрэҕириитин туйгуна, «Учууталлар учууталлара» бэлиэ хаһаайына, улуус Бочуоттаах олохтооҕо Степан Андреев, үөрэҕи сайыннарыы уонна идэ таһымын үрдэтии институтун уопсастыбаннай сибээскэ салаатын салайааччыта, улуус үөрэҕин ситимин кураатара Дария Санникова, ХИФУ билим үлэһитэ Февронья Шишигина, улуустааҕы үөрэх управлениетын начаалынньыгын эбээһинэһин толорооччу Ирина Плотникова, улуус оскуолаларын дириэктэрдэрин ассоциациятын салайааччыта Андрей Захаров эҕэрдэлээтилэр.

Искибиэр аныгылыы буккросинг ньыматынан, дьон-сэргэ кинигэни атастаһан ааҕарыгар кыах биэрэр. Буккросинг улахан сыала – кинигэни дьоҥҥо тиэрдии, биир сиргэ турууттан босхолооһун, дойдуну улахан бибилэтиэкэҕэ кубулутуу буолар. Саҥа үөрэх эбийиэгэ инникитин кинигэ ааҕар оҕолор уонна улахан дьон үөрэ-көтө тохтоон ааһар сирдэрэ буолуо диэн эрэнэбит.

Түмүктүүр тэрээһин, сүбэ-мунньах пленарнай чааһа Д.Ф. Ходулов аатынан култуура киинигэр ыытылынна. Сүрүн дакылааты улуустааҕы үөрэх управлениетын начаалынньыгын эбээһинэһин толорооччу Ирина Плотникова үөрэҕирии сайдыытын сүрүн соруктара улууспутугар олоххо кириитин, былырыыҥҥы дьылга турбут сыал-сорук туолуутун туһунан оҥордо. Улуус баһылыга Дмитрий Тихонов 2024-2025 саҥа үөрэх дьылыгар үөрэхпит эйгэтин салайааччыларыгар, бары үлэһиттэригэр саҥа соруктары туруорда.

Ону тэҥэ үөрүүлээх быһыыга-майгыга наҕараадалар туттарылыннылар.