Бүгүн, алтынньы 4 күнүгэр, Василий Николаевич Оконешников аатынан Павловскай орто оскуолата 150 сыллаах үбүлүөйдээх тэрээһинэ ыытылынна.

Биир үйэттэн ордук кэмҥэ оскуола билии сырдык уотун уматан, элбэх көлүөнэ ыччаты олоххо бэлэмнээн, төрөөбүт дойдубутугар үрдүк ситиһиилэри аҕалбыта. Оскуола истиэнэлэриттэн Саха сирин, Арассыыйабыт араас эйгэлэригэр үрдүк чыпчааллары дабайбыт элбэх чулуу дьон тахсыбыттара – биһиги барыбыт киэн туттуута буолар.

Үбүлүөйдээх тэрээһини эҕэрдэ тылынан улуус баһылыгын бастакы солбуйааччы Гаврил Толстяков арыйда, наҕараадалары туттарда.

Күн устата «Оҕо сааһым ыллыгынан” экскурсия, “Чемпион суолунан” РФ успуордун үтүөлээх маастара, оскуола 1987 сыллаах выпускницата Татьяна Юрьевна Жирковаҕа анаммыт итиэннэ “Үөрүү аргыстаах үлэ" быыстапкалары көрүү, «Олох үөһүгэр» кылаас чаастара, В.Н. Оконешников пааматынньыгар сибэкки дьөрбөтүн ууруу, “Көмүс ситим” выпускниктар хаамыылара, “Көлүөнэлэр көрсүһүүлэрэ” дьоро киэһэ үрдүк таһымнаахтык ыытылынна.

Ытыктабыллаах Павловскай орто оскуолатын кэллэктиибэ,

педагогическай үлэ бэтэрээннэрэ, оскуоланы араас сылларга бүтэрбит выпускниктар!

Улуустааҕы үөрэҕирии салалтата, үөрэх үлэһиттэрин профсоюһа эһиэхэ улуус биир кырдьаҕас нэһилиэгэр үөрэх умуллубат сырдык кыһата аһыллыбыта 150 сыллаах үөрүүлээх, өрөгөйдөөх күнүнэн истиҥ эҕэрдэбитин тиэрдэбит!

1875 сыллаахха балаҕан ыйын 24 күнүгэр нэһилиэк сиригэр маҥнайгы оскуола 13 оҕоҕо аанын тэлэччи аспыта. Бастакы учуутал - Илья Авксентьевич Чекалев үтүө аата-суола хаһан да дьон-сэргэ өйүттэн-санаатыттан сүппэт. Оскуоланы астарбыт киһинэн бэппэчиитэл Акепсим Михайлович Кушнарев буолар. Күннэр-дьыллар ааһаннар оскуола сэттэ, аҕыс кылаастанар, үүнүү-сайдыы үктэлэ арыллар. Мантан ыла Павловскай сыыйа кэҥээн, улаатан барбыта, нэһилиэк сылтан сыл ахсын олохтооҕун ахсаана элбээн испитэ.

1964 сылга орто оскуола аһыллыбыта. Мэтэдьиичэскэй үлэ, үөрэтии кэбиниэтинэй тиһигэ тэнитиллибитэ, ыччат өй-санаа, сиэр-майгы өттүнэн сайдарыгар кэскил олуга ууруллубута. Ол кэмнэрдээҕи шефтээх тэрилтэ - Ленин аатынан сопхуос салалтатын кытары биир ситимнээх үлэ барбыта. 

Оскуола билигин туһунан суоллаах-иистээх, олоҕурбут үгэстэрдээх. Ордук дьиэ кэргэни кытары, түөлбэнэн үлэҕэ, инженернай-техническай каадырдары бэлэмнээһиҥҥэ, оҕону сахалыы иитиигэ-үөрэтиигэ, успуорка уонна да атын хайысхаларга ситиһиитэ үгүс.

Күндү кэллиэгэлэр!

Оскуола оҕону иитэр-үөрэтэр кыһа быһыытынан үс үйэни уҥуордаан сайдан кэллэ. Бүгүҥҥү күҥҥэ эдэр, түмсүүлээх кэллэктиип үтүө үгэстэри утумнуур, кэлэр кэскил бигэ укулаатын уурар. 

Үөрүү өрөгөйүгэр уһун сыллаах сыралаах уонна дьулуурдаах үлэ түмүгүн ырытан көрүү, сыаналааһын ыытыллар, саҥа сыал-сорук туруоруллар. Баҕарабыт дьолу-саргыны, кэрэни айар-тутар кэскиллээх үлэҕитигэр үрдүктэн үрдүк ситиһиилэри! 

Үөрэҕирии салалтатын начаалынньыгын э.т.: И. Плотникова
Үөрэх үлэһиттэрин профсоюһун бэрэссэдээтэлэ: И. Скрябин