Муус устар 28 күнүгэр 2022 с. Майатааҕы «Мичил» оҕону сайыннарар киин улуустааҕы уһуйаан иитиллээччилэрин икки ардыларыгар, Саха Өрөспүүбүлүкэтэ тэриллибитэ 100 сылыгар, Үөрэҕирии ситимигэр биллэриллибит Ааҕыы сылыгар аналлаах куйаар ситимин нөҥүө, ОСТУОРУЙАҺЫТТАР диэн күөн-күрэhи ыытта.

Барыта 17 уһуйаантан, үстэриттэн сэттэлэригэр дылы саастаах, 50 оҕо 3 бөлөххө арахсан, кыттыыны ылла. Дьүүллүүр сүбэҕэ Брызгалова М.И. аатынан оҕо библиотекатын сэбиэдиссэйэ Дьяконова Ольга Николаевна, уһуйаан бэтэрээн иитээччитэ Трифонова Елена Ивановна уонна уһуйаан методиһа Потапова Лена Семеновна үлэлээтилэр.

Бу күрэх оҕо остуоруйаны өйтөн, геройдары уобарастарга аараран, остуоруйа ис хоhоонуттан көрөн, араастаан туттан-хаптан ааҕарга, оҕо бары өттүнэн сайдарыгар төhүү күүс буолар. Маны таhынан күрэх оҕо остуоруйа эйгэтигэр киирэн, уус-уран айымньыны интэриэhиргээн ааҕан, кинигэни таптыы үөрэнэригэр үөрэтэр, улахан ис хоһоонноох күрэх буолла. Дьүүллүүр сүбэ бу күрэххэ оҕо кэпсиир, саҥарар дьоҕура, кыра эрдэҕиттэн кэрэҕэ, үчүгэйгэ тардыhа үөрэнэ улаатара барыта баар диэн бэлиэтээтэ. Ол эрэн дьүүллүүр сүбэ сорох видеоларга оҕо саҥата иһиллибэтэ, кэлэр сылга видео хаачыстыбата үчүгэй буолара наада эбит диэн, санааҕа кэллэ.

Кыттыбыт оҕолор бары олус бэлэмнэммиттэр, остуоруйаны уустаан-ураннаан аахтылар, уобараһы арыйдылар.