Ахсынньы 17 күнүгэр Бырааттыы Пономаревтар ааттарынан Томтор орто оскуолатыгар үөрэҕирии тэриллибитэ 130 сылын уонна оскуолабыт аатын сүгэр ытыктыыр киһибит Алексей Андреевич Пономарев 120 сааһын бэлиэтээтибит.

Оскуоланы араас сылларга бүтэрбит көлүөнэлэр сарсыардаттан мустан сүһүөхтэригэр кылаас чаастарыгар сырыттылар, выставкалары көрдүлэр, хаартыскаҕа түстүлэр. Үбүлүөйбүтүн үөрүүлээх быһыыга-майгыга нэһилиэк аҕа баһылыга Мирон Анатольевич Свинобоев эҕэрдэ тылынан аһылынна. Ыҥырыылаах ыалдьыттар Саха Өрөспүүбүлүкэтин үөрэҕин миниистирин солбуйааччыта Владимир Иванович Тихонов, Мэҥэ Хаҥалас улууһун аҕа баһылыгын бастакы солбуйааччыта Василий Васильевич Михайлов, Мэҥэ Хаҥалас улууһун үөрэҕириитин салайааччыта Николай Лукич Никифоров, Мэҥэ Хаҥалас улууһун үөрэҕирии салалтатын профсоюһун бэрэссэдээтэлэ Иннокентий Михайлович Скрябин, Мэҥэ Хаҥалас улууһун оскуолаларын директордара кэлэн эҕэрдэлээн, баҕа санааларын эттилэр, өр сылларга үлэлээбит, таһаарыылаахтык үлэлии сылдьар үлэһиттэри наҕараадалаатылар, бэлэхтэри, сибэкки дьөрбөтүн туттардылар. Алексей Андреевич Пономарев сиэнэ, өр сылларга биһиги оскуолабытыгар үлэлээбит Людмила Ивановна Федорова эһэтин туһунан ахтыы оҥордо. Оскуолабыт директора Николай Николаевич Свинобоев бары ыалдьыттарын, нэһилиэк дьонун, үлэһиттэрин эҕэрдэлээтэ, махтал тылларын этэн туран бука бары ыалдьыттары, араас сылларга үөрэммит выпускниктары бырааһынньыктааҕы сандалыга ыҥырда.

Бырааттыы Пономаревтар ааттарынан Томтор орто оскуолата