Сэтинньи ый 29 күнүгэр Төхтүрдээҕи "Мичил" оҕону сайыннарар киин 50 сыллаах үбүлүөйүн көрсө, улуус иитээччилэрин олоҥхо алыптаах эйгэтигэр улууспут 15 уһуйааннарыттан 27 ыалдьыты түмтэ.

Бүгүн мустубут дьон педагогическай коллектив айымньылаах үлэтин кытта билистилэр, элбэххэ үөрэннилэр. Ол курдук олоҥхо маастар - педагога Верховцева А.Н. олоҥхону оҕоҕо кыра сааһыттан хайдах ньымаларынан уһуйуохха сөбүн, бэйэтин элбэх сыллаах үлэтин кистэлэҥнэрин үллэһиннэ. Иитээччи Шарина М.А. детсад саастаах оҕолорго чинчийэр үлэни ыытыыны, доклад, бырайыак суруттарыы туһунан сиһилии кэпсээн эдэр педагогтар болҕомтолорун тарта. Уһуйаан учуутал-логопеда Григорьева С.В. олоҥхону оҕолорго билиһиннэрэргэ туттуохха сөптөөх хамсаныылаах оонньуулары ыытан мустубут дьону сэргэхситтэ.

Салгыы иитээччилэр Баишева А.И. уонна Сергучева М.В. "Толкуйдаа, оонньоо, биһирээ" диэн биир этиинэн түмэн, элбэх сахалыы дидактическай оонньуулары көрдөрөн, иитээччилэр оонньоон үөрэнэн сэргээтилэр. Опыттаах педагог Олесова Т.Е. мустубут иитээччилэргэ туоһунан олоҥхо персонажтарын оҥотторон бэлэх биэрэн ыытта. Аныгы кэм сиэринэн, иитээччи Холмогорова М.К. олоҥхо бухатыырдарын лего конструкторынан оҥорон, компьютер нөҥүө хамсатан, охсуһуннартаан көрдөрдө, педагогтары араас легонан бэйэлэрин үлэлэтэн истибиттэрин-көрбүттэрин чиҥэттилэр. Эдэр педагог Колосова Л.Н. оҕо тылын сайыннарарга тарбах былчыҥнарын илиинэн үлэ нөҥүө сайыннарары кэпсээтэ, мустубут иитээччилэр эмиэ бэйэлэрэ тутан-хабан оҥордулар, оонньоон көрдүлэр. Музыкальнай салайааччы Пермякова Р.Н. оҕону кэрэ эйгэтигэр киллэрэн, олоҥхону музыкаҕа сыһыаран билиһиннэриини кэпсээтэ. "Олоҥхо - оҕо хараҕынан", олоҥхону араас ньыманан уруһуйдаан, оҕо айар дьоҕурун сайыннарыы тула кэпсээтэ иитээччи Афанасьева М.Н.

Тэрээһини барытын олоҥхо ситимнээтэ. Уһуйаан элбэх сыллаах айымнылаах үлэтэ биир ситимнээх буолбута оҕолор сайдан тахсалларыгар улахан суолталааҕын кэлбит ыалдьыттар бэлиэтээтилэр.

Ларионова М.Н., ИМО кыл.специалиһа