“Кэрэли” улуустааҕы оҕону эбии үөрэхтээһин киинигэр олоҥхо дэкээдэтин иитинэн олоҥхо күнүгэр анаммыт тэрээһин үрдүк таһымҥа буолан ааста.

Саха сиэринэн алаадьы астаан, сыт таһааран, кэлбит ыалдьыттары, оҕолору киин үлэһиттэрэ алаадьынан күндүлээтилэр. Оҕону эбии үөрэхтээһин киинин “Дьулусхан” фольклор куруһуогун салайааччыта Светлана Никитина сахалыы сиэринэн алгыһынан тэрээһини арыйда. В.П.Ларионов аатынан Майа орто оскуолатын 9 “Б” кылааһын үөрэнээччитэ, Анастасия Слепцова салайааччылаах “Айылгы” фольклорнай куруһуок иитиллээччитэ Дайаана Попова тойугунан ситэрэн-хоторон биэрдэ. “Кэрэли” оҕону эбии үөрэхтээһин киин салайааччыта Марианна Билюкина киирии тылыгар ханнык баҕарар уопсастыба төрүт култууратыгар уонна норуот педагогикатыгар олоҕуран, ситиһиилээх киһини иитэр. Үүнэр көлүөнэ төрөөбүт култууратыгар тирэҕирэн, киһи аймах сыаннастарын өйдүүр, ытыктыыр буола улаатарыгар норуот педагогиката олук уурар диэн педагогтарга, төрөппүттэргэ уонна оҕолорго туһаайан эттэ. Олоҥхо педагогикатынан үлэлиир Тарат сүрүн үөрэхтээһин кыһатын педагога Прасковья Лебедева ыалдьыттаан, олоҥхо-саха киһитэ өйдүүр өйүн сүмэтэ, саныыр санаатын саргыта, уус тылын сүөгэйэ, кута-сүрэ, сиэрэ-туома олоччу түмүллүбүт сүдү айымньыта буолар диэтэ. Ол сиэринэн, аныгы, уларыйа турар, глобализация күүскэ киирэр кэмигэр олоҥхону араас өттүттэн көрөн, чинчийэн, наардаан аныгы оҕону иитэр систиэмэ оҥорор мүччүрүйбэт сорук турарын эттэ.

“Айылгы” фольклор куруһуогун иитиллээччилэрэ, В.П.Ларионов аатынан Майа орто оскуолатын 6 “Б” кылааһын үөрэнээччилэрэ П.А.Слепцов-Ойуунускай “Ньургун Боотур” олоҥхоттон быһа тардан иһитиннэрдилэр. Онтон 9 “Б” кылаас үөрэнээччилэрэ Петр Игнатьев “Кулан Кыыртай бухатыыр” олоҥхону толордулар. Олоҥхо дьиэтин фольклорга исписэлииһэ Айта Васильева ыалдьыттаан Петр Игнатьев “Кулгааҕын харатынан куотан көстөр кукаакы кугас аттаах Кулан Кыыртай бухатыыр” олоҥхо толоруутун маастарыстыбатын көрдөрбүтүн мустубут дьон биир тыынынан истэн сэргээтибит.

Бу күн “Героический эпос-Олоҥхо глазами детей” диэн ааттаммыт улуустааҕы оҕолор уруһуйдарын күрэҕэ түмүктэннэ. Барыта 14 оскуолаттан 105 оҕо уруһуйунан кытынна. Күрэх түмүгүнэн 9 лауреат, 23 дипломант быһаарылынна. “Олоҥхо алыптаах эйгэтэ” улуустааҕы өйтөн суруйуу күрэҕэр 12 оскуолаттан 60 оҕо өйтөн суруйууга кыттыбытыттан 10 лауерат, 12 дипломант сыаналанна. Бу тэрээһиҥҥэ кыттыбыт хас биирдии оҕо, улахан киһи сахалыы тыыны иҥэринэн, олоҥхо алыптаах эйгэтин кытары алтыһан аастылар.

Зоя Герасимова