Кулун тутар 3 күнүгэр Төхтүрдээҕи “Мичил” уһуйааҥҥа "Оҕо сайдарыгар, иитиллэригэр олоҥхо суолтата" диэн ааттаах олоҥхонон үлэлиир иитээччилэргэ, уһуйааччыларга аналлаах улуустааҕы олоҥхо семинара буолан ааста.

Улуустааҕы семинар ыҥырыылаах ыалдьыттарынан буоллулар: Попова Галина Семеновна-Санаайа- этнопедагог, педагогика билимин кандидата, ХИФУ дассыана, ХИФУ культорологияҕа кафедратын профессора, СӨ үөрэҕириитин туйгуна, Никитина Ньургуйаана Гаврильевна - "Айыы Кыһата" национальнай гимназия төрүт култууратын учуутала, педагогика билимин кандидата, Степанова Анисия Николаевна - "Олоҥхо дьиэтин" сүрүннүүр үлэһитэ.

Попова Г.С. иитээччилэргэ олус туһалаах сүбэ-ама биэрдэ, ыйытыыларга хоруйдаата, Никитина Н.Г. семинарга кэлбит иитээччилэри үс бөлөххө арааран "Модун Эр Соҕотох" олоҥхону уобарастарга арааран аахтарда. Степанова А.Н. сөпкө тыыныыга, кылыһах таһаарар эрчиллиилэргэ маастар кылаас ыытта, Верховцева А.Н оҕолорго олоҥхо үөрэтэр ньымаларын кэпсээтэ, опытыттан үллэһиннэ.

Төхтүрдээҕи "Мичил" уһуйаана иитээччилэрэ бары бииргэ, түмсэн үлэлиир "Олоҥхо алыптаах эйгэтэ" бырайыакиарынан быыстапка тэрилиннэ.

Улууспут уһуйааннарыттан олоҥхону интэриэһиргиир, оҕолору уһуйар 32 иитээччи кэлэн кыттыыны ылан бардылар.