Муус устар 17 күнүгэр Ороссолуодаҕа биир кэрэ түгэн буолла. Ороссолуода бөһүөлэгин бочуоттаах олохтоҕо, Саха Өрөспүүбүлүкэтин үөрэҕириитин туйгуна, РФ бочуоттаах улэһитэ, «Дети Саха Азия» степендиата оҕо иитиитигэр 55 сыл, Ороссолуода оҕо саадыгар 50 сыл эҥкилэ суох үлэлии сылдьар Мартынова Акулина Константиновна «Оҕоҕо анаммыт олох» дьоро бэлиэ күнүгэр, ыҥырыылаах ыалдьыттар тоҕуоруһа муһуннулар.

«Ааспыты сэгэтэн корүөҕүн, ахтан, санаан ааһыаҕын» Акулина Константиновна туруорбут выставкатыгар кэлбит ыалдьыттар билбэтэхтэрин билэн, көрбөтөхтөрүн көрөн сэҥээрэн көрдүлэр.

Акулина Константиновна тэрийбит Далбар ансамбылын кыттыылаахтара «Саха буолан сандаар» диэн сиэр, туом оҥорон, «ОҔОҔО анаммыт олох» тэрээһин үөрүүлээх чааһа үрдүк таһымҥа ааста. Ил ТҮМЭН, Улуус администрациятын, улуус үөрэҕириигэ салалтатын, олохтоох нэһилиэк баһылыгын, бииргэ устудьуоннаабыт, бииргэ үөрэммит у.д.а ыҥырыылаах ыалдьыттар иһирэх тыллары эттилэр, бэлэхтэри туттардылар.

Акулина Константиновна биир тэрилтэҕэ өр сыл эҥкилэ суох таһаарыылаахтык улэлии сылдьар коллегаларыгар эмиэ утары уунар бэлэхтээх буолла. Ол курдук Соловьева Варвара Анатольевнаҕа - үрүҥ көмүс «Почетный работник Кунчээн» бэлиэ, «Лучший работник ДО» степендия иитээччи көмөлөһөөччүтэ Петрова Мария Ивановнаҕа, «Лучший воспитатель» Сергеева Раиса Сулусовнаҕа туттартаата.

Өрөгөйдөөх үбүлүөйү оскуола оҕолоро, уһуйаан иитиллээччилэрэ монтаж ааҕан, ырыа ыллаан, үнкүүлээн олуһун киэргэттилэр.