Ахсынньы 4 күнүгэр Анна Егоровна Зыкова аатынан Майатааҕы Мичил оҕону сайыннарар киинҥэ улуус уһуйааннарын спортивнай инстуктордарыгар анаан Наарта үрдүнэн ыстаныыга олус солун семинар буолан ааста.

Хаптаҕай, Чүүйэ, Аллараа Бэстээх, Павловскай, Табаҕа, Майа уһуйааннарыттан кэлбит биир идэлээхтэрбит иннилэригэр Дьокуускай куораттан, Өрөспүүбүлүкэбит Баһылай Манчаары аатынан “Модун” спортивнай комплекс хотугу дэгит көрүҥнэргэ сүрүннүүр тренера, сахалартан бастакы успуорт маастара Сыромятников Анатолий Гаврильевич кэлэн сүрдээх интэриэһинэй маастар кылаас биэрдэ, күрэх сүрүн быраабылаларын билиһиннэрдэ.

Ону тэнэ “Парус” спорткомплекс сахалыы төрүт көрүҥнэригэр методист инструктора Яковлева Аграфена Юрьевна Мичил уһуйаан улууска бастакынан ылсан оҕолору дьарыктаан эрэрин хайҕаллаах суол диэн эттэ уонна салҕыы оҕолору кытта төрүт көрүҥнэринэн утумнаахтык дьарыктаналларын баҕарда уонна күрэх уопсай балаһыанньатын билиһиннэрдэ.

Кэлбит ыалдьыттар иннилэригэр Наарта үрдүнэн ыстаныыга бырайыагын сырдатта уонна дьарык этаптарын көрдөрдө Мичил уһуйаан спортинструктора Лонгинова Наталья Семеновна.

Семинар кыттыылаахтара бу көрүҥҥэ дириҥ билии ылан, аны саас күрэххэ көрсүөх буолан тарҕастылар.

Анна Егоровна Зыкова аатынан Майатааҕы «Мичил»
оҕону сайыннарар киин салайааччыта
Виктория Бурнашева