Ахсынньы 13 күнүгэр Афанасий Чугунов аатынан Мэлдьэхси орто оскуолатыгар СР академиятын академига, аграрнай үөрэхтээһин норуоттар икки ардыларынааҕы академиятын Хотугу форум, РФ, СР наукатын үтүөлээх деятелэ, РФ үрдүкү профессиональнай үөрэхтээһин бочуоттаах үлэһитэ, РФ суруйааччыларын союһун чилиэнэ, суруналыыс, Мэҥэ-Хаҥалас бочуоттаах гражданина Афанасий Чугунов 80 сааһынан олоҕун, айар уонна научнай үлэлэрин сырдатар, дириҥ ис хоһоонноох, сүдү суолталаах түмэл арылынна.

Бу тэрээһин агро хайысхалаах оскуолалар тэриллибиттэрэ 30 сылларын түмүктүүр биир бэлиэ түгэнинэн буолла. Үөрүүлээх тэрээһиҥҥэ Афанасий Чугунову кытары бииргэ алтыһа сылдьар биир дойдулаахтара, агрохайысхалаах оскуолалар салайааччылара, Дьокуускайтан, Уус Алдан улууһуттан бэрэстэбиитэллэр кыттыыны ыллылар. Бэлиэтээн эттэххэ,Мэлдьэхси орто оскуолатыгар бу иккис түмэл аһылынна. Оскуола агрохайысханан үлэлиирин таһынан, дуобат уонна мас тардыһыы көрүҥнэригэр үөрэнээччилэри утумнаахтык дьарыктаан үрдүк көрдөрүүлэри ситиһэллэр. Академик Афанасий Чугунов аатынан түмэл аһыллан үөрэнээччилэргэ, оскуола кэлэктиибигэр, нэһилиэк дьонугар дьоһун суолталанан, үлэҕэ, үөрэххэ төһүү буолуоҕа.

Зоя Герасимова.