Алтынны 27-28 күннэригэр Чурапчы улууһугар Педагог уонна уһуйааччы, Саха Өрөспүүбүлүкэтигэр физкультурнай хамсааһын 100 сылларыгар аналлах XXXVII Илин-эҥэрдээҕи үөрэҕирии тэрилтэлэрин салайааччыларын спартакиадатыгар Мэҥэ-Хаҥалас улууһун хамаандата кыайыы өрөгөйүн билэн 1 миэстэ буолары ситистэ.

Хамаанда салайааччыта Мэҥэ-Хаҥалас үөрэҕириитин салалтатын начальнига Гаврил Николаевич Толстяков, ону тэҥэ начальнигы солбуйааччылар Плотникова И.М., Захаров А.В., оскуола дириэктэрдэрин ситимнэрин салайааччы Илларионов М.М., үөрэх үлэһиттэрин профсоюһун территориальнай кэмитиэтин бэрэссэдээтэлэ Скрябин И.М. уо.д.а. кыттыыны ыллылар.

Уопсайа улууспут 27 салайааччыта чаҕылхай кыайыылары аҕаллылар. Уопсайа 9 көрүҥҥэ күрэхтэстилэр. Остуол тенниһигэр, буулдьанан, оҕунан ытыыга, волейболга, канат тардыһыытыгар, саахымакка, дуобакка, дартска, хабылыкка, хаамыскаҕа илин-кэлин түһүстүлэр. 

Күрэх түмүгүнэн 1 миэстэ Мэҥэ-Хаҥалас, 2 миэстэ Чурапчы, 3 миэстэ Уус-Алдан, 4 миэстэ Амма, 5 миэстэ Таатта улуустарын хамаандалара таҕыстылар. Онон Мэҥэ-Хаҥалас улууһун үөрэҕириитин тэрилтэлэрин салайааччылара атырдьах ыйыгар ыытыллыбыт өрөспүүбүлүкэтээҕи үөрэҕирии үлэһиттэрин спартакиадатыгар бастаабыттарын бигэргэттилэр. 

Дьоһун кыайыынан биир дойдулаахтарбытын эҕэрдэлиибит!

#ГодПедагогаНаставника
#ГПН_2023
#ГПН_МКулус