Олунньу 18 күнүгэр И.М. Романов аатынан Төхтүр орто оскуолатыгар "Оҕону иитии: саҥа кэм соруктара, аныгы эппиэттэр" диэн улууспут үөрэҕириитин үлэһиттэрин уонна уопсастыбаннаһын олунньу ыйынааҕы сүбэ мунньаҕа ыытылынна.

Мунньах улуустааҕы үөрэҕирии салалтатын салайааччыта Гаврил Толстяков 2024 сылга ыытыллыбыт үлэни-хамнаһы итиэннэ үүммүт сылга соруктары сырдатыытыттан саҕаланна. Сүрүн дакылаат кэннэ ыҥырыылаах ыалдьыттар мунньах хаамыытынан иһитиннэриилэри оҥордулар.

Улуус баһылыгын социальнай уонна имиджевэй бэлиитикэҕэ солбуйааччы Татьяна Егорова мустубут бар дьоҥҥо үтүө түһүлгэ тэриллибитэн эҕэрдэтин тиэртэ итиэннэ таһаарыылаах үлэни баҕаран туран наҕараадалары туттарда. Ол курдук,

“Мэҥэ Хаҥалас улууһун үөрэҕириитин сайдыытыгар кылаатын иһин” түөскэ кэтиллэр бэлиэни Инновационнай сайдыы киинин дириэктэригэр Дмитрий Титовка туттарда. Ону тэҥэ үөрүүлээх быһыыга “Мэҥэ Хаҥалас улууһа” муниципальнай оройуон баһылыгын үөрэҕирии политехническэй хайысхатын сайыннарыыга туһуламмыт 500 000 солкуобайдаах гранынан И.Г. Тимофеев аатынан Майатааҕы лиссиэй уонна Е.П. Шестаков-Эрчимэн аатынан Бырама сүрүн уопсай үөрэхтээһин оскуолата наҕараадаланнылар.

Улуустааҕы үөрэҕирии салалтатын салайааччыта Гаврил Толстяков идэлэригэр үрдүк сатабыллаах уонна көдьүүстээхтик бииргэ үлэлиир дьону улуустааҕы үөрэҕирии салалтатын бочуоттаах грамоталарынан бэлиэтээтэ. Ону тэҥэ 2023-2024 сыл түмүгүнэн СӨ үөрэнээччилэригэр иккис төгүлүн ыытыллыбыт “Спортивные Якутяне” спартакиадаҕа улууспут оҕолорун хамаандата үрдүк ситиһиини ылалларыгар кылааттарын киллэрбит Мэҥэ Хаҥалас улууһун оҕо спортивнай оскуолатыгар, салайааччы Петр Илларионов 100 000 уонна В.П. Уваров аатынан улуустааҕы олимпийскай эрэл оскуолатыгар, салайааччы Дьулустаан Захаров 50 000 солкуобай суумалардаах туоһу суруктары туттарда. Итиэннэ 2023-2024 үөрэх дьылыгар “Манчаары оҕолоро” спортивнай-комплекснай спартакиадаҕа инники күөҥҥэ тахсыбыт оскуолалары бэлиэтээтэ, харчынан бириэмийэлээх туоһу суруктары туттарда. 

Салгыы мунньах ыҥырыытыгар олоҕуран бырайыактары оҥорууга алта хайысханан арахсан үлэ тэрилиннэ. Манна улуус салалтата, нэһилиэк баһылыктара, оскуола дириэктэрдэрэ, уһуйаан сэбиэдиссэйдэрэ, эбии үөрэхтээһин киинин салайааччылара, дириэктэри иитэр үлэҕэ солбуйааччылар, иитэр үлэҕэ дириэктэр сүбэһиттэрэ, уһуйаан иитээччилэрэ, төрөппүт сэбиэтин чилиэттэрэ көдьүүстээх үлэ ыытаннар бырайыактары оҥордулар.

Күн иккис аҥарыгар бырайыактары көмүскээһин ыытылынна. Экспертарынан Ил Түмэн дьокутааттара Андрей Находкин, Захар Никитин, Тихон Скрябин, улуустааҕы үөрэҕирии салалтатын салайааччыта Гаврил Толстяков, “Микрополис” ХЭТ салайар хампаанньа генеральнай салайааччыта, “Индустрия будущего” тэрилтэ дириэктэрэ Иван Степанов үлэлээтилэр. Түмүктүүр чааска пленум тэрилиннэ, күн түмүгүнэн киирбит этиилэргэ, санааларга, туруорсууларга олоҕуран резолюция торума ылылынна.