Олунньу 12-13 күннэригэр «Дойдуга үөрэҕирии программаларыгар утумнааһыны киллэрии: уһуйаантан үрдүк үөрэххэ дылы» тиэмэлээх  Мэҥэ Хаҥалас улууһун үөрэҕириитин үлэһиттэрин Олунньутааҕы мунньаҕа ыытылынна.

Олунньу 12 күнүгэр 9 кустовой мэтэдьиичэскэй холбоһуктарынан улууска мэтэдьиичэскэй сулууспа 85 сылын түмүктүүр дьаһаллар ыытылыннылар. Барыта 834 киһи кыттыыны ылла. Үөрэх тэрилтэлэринэн быыстапкалар, аһаҕас уруоктар, дьарыктар,  маастар-кылаастар, педагогическай үлэ бэтэрээннэрэ эдэр педагогтары кытта көрсүһүүлэрэ, төгүрүк остуоллар ыытылыннылар. Бу күн сыл устата ыытыллыбыт Методическай марафон түмүгэ таҕыста. Бастыҥ педагогтар, салайааччылар улуустааҕы үөрэҕирии салалтата олохтообут  «За успехи в учебно- воспитательной работе» бэлиэлэрин туттулар.

Олунньу 13 күнүгэр Аллараа Бэстээххэ улуус баһылыга Д.И.Тихонов үөрэх тэрилтэлэрин салайааччыларын кытта көрүстэ. Мунньах пленарнай чааһыгар улуус баһылыга Д.И.Тихонов, оройуон депутаттарын сэбиэтин бэрэссэдээтэлэ И.И.Андросов, Ил Түмэн депутата А.М.Находкин, С.Н.Донской- II аатынан  үөрэҕирии сайдыытын уонна идэни  үрдэтэр институт дириэктэрин э.т. Ю.Е.Шишигин, уопсастыбаннаһы кытта сибээс салаатын салайааччыта Д.Н.Санникова кыттыыны ыллылар. Сүрүн дакылааты улуустааҕы үөрэҕирии салаатын салайааччыта И.М.Плотникова оҥордо. Тыл эппит Д.И.Тихонов, А.М.Находкин, Ю.Е.Шишигин үөрэҕирии үлэһиттэрин иннигэр үүммүт 2026 сылга соруктары туруордулар.

Буоларын курдук улуус бастыҥ учууталлара, иитээччилэрэ, эбии үөрэхтээһин педагогтара үөрүүлээх быһыыга-майгыга биэдэмистибэннэй наҕараадалары туттулар. Үөрэх үлэһиттэрин профсоюһун Мэҥэ Хаҥаластааҕы территориальнай тэрилтэтин өйөбүлүнэн ыытыллар  бастыҥ педагогтар күрэхтэрин кыайыылаахтара  Иванова Людмила Ивановна (Аллараа Бэстээх «Сказка» уһуйаан),  Иванова Надежда Владимировна (Бүтэйдээх орто оскуолата),  Тарасова Евдокия Ильинична (Майатааҕы лиссиэй), Борисова Любовь Александровна (Төҥүлү орто оскуолата), Куприянова Оксана Петровна (Чыамайыкы орто оскуолата) бэлиэтэннилэр. Мэтэдьиичэскэй сулууспа сайдыытыгар кылааттарын иһин Дмитриева Саргылана Михайловна (Майа В.П.Ларионов аатынан орто оскуолата), Борисова Сардана Николаевна (Майатааҕы лиссиэй), Павлова Мария Гаврильевна (Матта орто оскуолата), Борисова Мария Гаврильевна (Үөрэтэр-оҥорон таһаарар киин), Шестакова Саргылана Федоровна (Төҥүлүтээҕи «Олимпионик» оҕону сайыннарар киин) анал үбүлүөйдээх бэлиэ хаһаайыннарынан буоллулар.

Үүммүт 2026 сылы Российскай Федерация үөрэҕириитин министиэристибэтэ оскуола иннинээҕи үөрэхтээһин сылынан биллэрбитэ. Мэҥэ Хаҥалас улууһугар быйыл оскуола иннинээҕи үөрэхтээһин 100 сылын туолар. 1926 сыллаахха Хаптаҕайга маҥнайгы оҕо былаһаакката тэриллибитэ. Бу историческай түгэннэри үөрүүлээхтик арыйыы үрдүк таһымҥа ыытылынна. История араас кэрдиис кэмнэрин уонна аныгы туругун улуус иитээччилэрэ уонна кырачаан иитиллээччилэр итэҕэтиилээхтик көрдөрдүлэр.

2026 сыл биһиэхэ икки төгүл эппиэтинэстээх буолла. Уһуйааннар материальнай-техническай базаларын тупсарыыга, педагогическай каадырдары өйөөһүҥҥэ, иитии саҥа методикаларын киллэриигэ биһигиттэн былааннаах үлэ ирдэнэр.

Хаартыскалар