Бүгүн, ахсынньы 25 күнүгэр, Мэҥэ Хаҥалас улууһун баһылыгын Саҥа дьыллааҕы харыйата ыытылынна.

Үөрүүлээх тэрээһиҥҥэ улуус нэһилиэктэрин оскуолаларыттан туйгун үөрэхтээх, улуустааҕы, өрөспүүбүлүкэтээҕи, Арассыыйа уонна норуоттар икки ардыларынааҕы спортивнай, култуурунай күрэхтэргэ, куонкурустарга, олимпиадаларга үрдүк ситиһиилээх үөрэнээччилэр кыттыыны ыллылар.

Оҕолору улууспут баһылыга Дмитрий Тихонов, улуустааҕы үөрэҕирии управлениетын начаалынньыга Николай Никифоров эҕэрдэлээтилэр, анал ааттары, бэлэхтэри туттардылар.

Бу сыл түмүгүнэн "Удьуор утумун оскуолата", "Дьоруой биир дойдулаахтара буоларбынан киэн туттабын", "Төрөөбүт дойдум айылҕатын харыстыыбын", "Идэни талыы - олоххо сүрүн хардыы", "Манчаары сиэттэрэ - эт-хаан өттүнэн чэгиэн буолуу уонна доруобуйа култуурата", "Хомус – оҕолору саха норуотун төрүт муусукатын эйгэтигэр уһуйуу" хайысхаларга бииртэн биир чаҕылхай, бастыҥ үөрэнээччилэр Мэҥэ Хаҥалас улууһун баһылыгын стипениятынан наҕараадаланнылар.

Ону таһынан "Мэҥэ кэскилэ" оҕо хамсааһынын 2022 сыл түмүгүнэн лауреаттарын бэлиэтээтилэр.

Саҥа үүнэр сылга оҕолорбутугар туйгун үөрэҕи, чэгиэн доруобуйаны, ситиһиилэри баҕарабыт, үүнэн-сайдан төрөөбүт дойдугут туһугар үтүө үлэһит дьон буолуоххут диэн эрэнэбит!

Зоя Герасимова хаартыскалара

Подробнее: https://xn--h1abcx8dca.xn--p1ai/article/84330